Endi jyl saıyn jazǵy ýaqytta kishkentaı ekibastuzdyqtar men olardyń ata-analary basseınge barady. Qaladaǵy mádenı-sporttyq is-sharalar «Shahter» saıabaǵynda ótedi. Konserttik baǵdarlamalar ótetin amfıteatry bar. Balalarǵa attraksıon alańy da qyzyqty. Sýburqaq ta kókke áýeleıdi. Keshke jaryq shashyp, mýzykalyq áýen oınap turady. Astananyń 20 jyldyǵyna tartý retinde saıabaqta 128 shyrsha otyrǵyzyldy.
Jańadan ashylǵan basseınge bir mezette 100 adam shomyla alady. Kelýshilerge barlyq jaǵdaı jasalǵan. Ájethana, demalatyn, turmystyq bólmeler, sheshinetin oryndar bar. Sý árdaıym taza bolý úshin arnaıy súzgilermen jabdyqtalǵan.
– Eýrazııalyq Toptyń ERG kásiporyndary ornalasqan qalalarda turǵyndar ómirin barynsha jaıly etýge baǵyttalǵan «Rodnye goroda» baǵdarlamasy bastaldy. Qalada tabıǵı sý joq ekendigin eskersek, endi ekibastuzdyqtarda tamasha demalys orny paıda boldy, deıdi
«Eýrazıattyq energetıkalyq korporasııa» AQ «Vostochnyı» kenishiniń dırektory Iýrıı Goncharov.
«Eýroazıattyq energetıkalyq korporasııa» AQ Ekibastuzdy kórkeıtýge úles qosýda. Balabaqshalar jáne sport alańdaryn abattandyryp, qalalyq saıabaqtar jáne gúlzarlarǵa jasyl jelekter egildi. Memorandým aıasynda ERG kompanııasy oblystaǵy áleýmettik jobalar sanalatyn Aqsýdaǵy sport saraıy, jabyq hokkeı korty, Ekibastuzdaǵy balalar mýzyka mektebi, oblys ortalyǵyndaǵy shomylý basseıniniń qurylysyna, tramvaı vagondaryn satyp alý, mektepterdi kúrdeli jóndeýden ótkizýge qarjy bóldi.
Farıda BYQAI,
«Egemen Qazaqstan»
EKIBASTUZ
