«Eginniń qazirgi jaǵdaıy astyqtyń kólemi byltyrǵydan kem túspeıdi deýge bolady. Biz barlyq kúsh-jigerdi jumsap, astyqty tókpeı-shashpaı, barynsha qysqa merzimde jınap alýymyz qajet. Kúzgi jıyn-teringe daıyndyq jospar boıynsha júrgizilip keledi. Janar-jaǵar maı jetkilikti bolady. Oblysqa 1 lıtri 172 teńgeden 76 myń tonna dızel otyny bólindi», dedi óńir basshysy.
Oblys ákiminiń birinshi orynbasary Ǵaýez Nurmuhambetovtyń aıtýynsha, bıyl barlyǵy 4,7 mln alqapqa dándi daqyldar egilgen. Byltyrǵa qaraǵanda bıyl dándi daqyldar alqaby 100 myń gektarǵa azaıyp, onyń ornyna 101 myń gektarǵa arpa, 21 myń gektarǵa burshaq tuqymdastar, 78 myń gektarǵa maıly daqyldar sebilgen.
«Bıyl egin úshin aýa raıy asa qolaıly bolmady. Soltústik aýdandarda ylǵaldyń tym kóp túsýi men kúnniń salqyndyǵy, ońtústik aýdandardaǵy qýańshylyq eginniń jetilýine keri áser etti. Qazir 2,6 mln gektar jerdiń egini óte jaqsy, 1,3 mln gektardyń egini qanaǵattanarlyq kúıde. Degenmen astyqtyń túsimi jaman bolmaıdy degen úmittemiz», dedi Ǵaýez Torsanuly.
Oblys boıynsha tehnıka parkiniń daıyndyǵy da jaqsy. Bıyl astyq alqabyna 9,6 myń kombaın shyǵady. Onyń 3 myńy joǵary ónimdi jańa tehnıkalar bolyp sanalady. 3 myń jatka, 8 myń astyq tasıtyn mashınalar, taǵy basqa da tehnıkalar qatyspaq.
Mamandardyń boljamynsha, astyq jınaý naýqany 25-30 kúnde, ıaǵnı qyrkúıektiń 25-ne deıin tolyq aıaqtalady.
Názıra Járimbet,
«Egemen Qazaqstan»
Qostanaı
