Jalpy, baıqaýǵa qatysýǵa nıet bildirgen otbasylardan ótinim osy jyldyń sáýir aıynan bastap qabyldanǵan bolatyn. Al irikteý kezeńinde Sátbaev qalasy, Qarqaraly, Abaı jáne Jańaarqa aýdandary atynan qatysqan otbasylardyń ómir tarıhy men óneri qazylar alqasynyń kóńilinen shyqty.
Sonymen, bıylǵy «Mereıli otbasy-2018» baıqaýynyń oblystaǵy jeńimpazy bolyp Qarqaraly aýdanynda turatyn Ilimbaevtar otbasy tanyldy. Úzdik shyqqan áýlettiń uıytqysy Rymtaı áje 19 bala, 47 nemere, 13 shóbereniń ardaqty anasy.
– Bizdiń otbasymyzda 11 qyz jáne 8 ul bar. Shynyn aıtqanda, biz bul baıqaýda jeńemiz dep oılamaǵan edik. Álbette, óte qýanyshtymyz. Bul baıqaýǵa qatysý týraly oı kishi sińlimnen shyqty. Qudaıǵa shúkir, otbasymyz úlken jáne óte tatýmyz. Áýlette toı bola qalsa, ózimiz ǵana bir meıramhanany toltyryp jiberemiz. Otbasymyzben jıi bas qosamyz. Merekelerdi, ásirese, toılar men shildehanalardy unatamyz. Naýryz toıy biz úshin eń ulyq mereke, – deıdi bastaýysh synyp muǵalimi Ásem Ilimbaeva.
Sátbaev qalasynan kelgen Áýezovter otbasy ekinshi oryn alsa, Nura aýdany atynan qatysqan Nurǵalıevter otbasy úshinshi oryndy mise tutty.
Baıqaýdy uıymdastyrýshylar jeńimpaz otbasyna shıpajaıǵa joldama tartý etse, ekinshi jáne úshinshi orynǵa taban tiregen otbasylar gramotalar men sheteldik qymbat teledıdarlarǵa ıe boldy.
Endi oblysta úzdik shyqqan Ilimbaevtar otbasy «Mereıli otbasy-2018» baıqaýynyń respýblıkalyq kezeńinde Qaraǵandy óńiriniń namysyn qorǵaıtyn bolady.
Qaırat ÁBILDA,
«Egemen Qazaqstan»
QARAǴANDY
