Is-sharaǵa Premer-Mınıstrdiń orynbasary Asqar Jumaǵalıev, Prezıdent Ákimshiliginiń, Úkimettiń ókilderi, Qarjy mınıstri, Úılestirý keńesiniń músheleri qatysty.
Jıyn barysynda Memleket basshysynyń «Sıfrly Qazaqstan» baǵdarlamasy sheńberindegi tapsyrmasyna sáıkes elimizde qylmystyq sot isin júrgizýdi elektrondy formatqa kezeń-kezeńmen kóshirýdiń júzege asyrylyp jatqany atalyp ótti.
Bas prokýrordyń málimdeýinshe, jobany iske asyrýdyń basty maqsaty – azamattardyń quqyqtaryn qorǵaý jáne sot tóreligine jyldam qol jetkizýdi qamtamasyz etý.
Jalpy, salany avtomattandyrý qylmystyq prosestiń barlyq satysyn, atap aıtqanda, qylmysty tirkeýden bastap úkim oryndalǵanǵa deıingi satylardy qamtıdy dep kútilýde.
Sondaı-aq isterdi elektrondy formatta tergep-tekserýdiń artyqshylyǵy retinde ońtaılandyrý, dáleldemelerdi jınaý jáne prosestik qujattardy jasaý rásimderiniń jeńildetilýi, sondaı-aq prokýrorlyq jáne sot baqylaýyn kúsheıtý týraly aıtyldy.
Otyrysta keltirilgen málimetterge súıensek, búgingi tańda 5 myńǵa jýyq is elektrondy túrde tergep-tekserilýde, onyń 2,3 myńy sotqa joldanǵan.
Al Úılestirý keńesiniń tóraǵasy – Bas prokýror Qaırat Qojamjarov atap ótkendeı, elektrondy sot isin júrgizýdi tolyqqandy engizý úshin qylmystyq qýdalaý organdaryn qarjylandyrý, tıisinshe tehnıkalyq jaraqtandyrý jáne qyzmetkerlerge ony júrgizý daǵdylaryn oqytý máselelerin sheshý qajet.
Osyǵan baılanysty, Úkimet músheleri jobany odan ári iske asyrý úshin qarajat bólý máselesin talqylady, al quqyq qorǵaý organdarynyń basshylaryna qylmystyq prosesti kezeń-kezeńmen avtomattandyrý merziminiń múltiksiz saqtalýyn qamtamasyz etý tapsyryldy.
Odan keıin qylmystyq proseste azamattardyń qorǵalý deńgeıin kóterý, onyń ásire qatańdyǵyn tómendetý, qylmystyq sot isin júrgizý nysandaryn ońtaılandyrý boıynsha ýákiletti organdardyń qabyldap jatqan sharalar týraly baıandamalary tyńdaldy.
Jıynda belgili bolǵandaı, qylmystyq jáne qylmystyq-prosestik zańnamany jańǵyrtýǵa baǵyttalǵan zań qoldanysta bolǵan 7 aı ishinde ustalǵandar (9 789-dan 6 508-ge deıin), kúzetpen ustalǵandar (8 835-ten 6 148-ge deıin) jáne bas bostandyǵynan aıyrýǵa sottalǵandar (12 414-ten 4 231-ge deıin) sany úshten birge azaıǵan.
Osy jyldyń naýryzynan bastap sottar jasyryn tergeý áreketterin júrgizýge 8 myń sanksııa bergen. Buıryqtyq is júrgizý tártibimen 600-den astam is aıaqtalǵan.
Bas prokýror, sonymen qatar jasyryn tergeý áreketterine bastama jasaý kezinde zańdylyqtyń saqtalýyn jáne azamattardyń quqyqtarynyń buzylýyna jol berilmeýin, azamattardy negizsiz ustaý faktilerin boldyrmaýdy, dáleldemelerdi jınaý boıynsha advokattardyń ókilettikterin iske asyrý kepildiginiń qamtamasyz etilýin tapsyrdy.
Úılestirý keńesiniń qorytyndysy boıynsha birqatar naqty usynymdar ázirlendi.
Serik ÁBDIBEK,
«Egemen Qazaqstan»
