Nursultan Nazarbaev kóship kelgen otbasylarmen áńgimelesý barysynda qonys aýdarǵan turǵyndarǵa memleket tarapynan barlyq jaǵdaı jasalyp jatqanyn atap ótip, óziniń de ómir joly týraly aıtyp berdi.
– Meniń Almaty qalasynyń mańynda dúnıege kelgenimdi bilesizder. 17 jasymda týǵan ólkemnen kettim. Osyndaı sheshim qabyldap, men túrli óńirde eńbek jolynan óttim. Kezdesken qıyndyqtardy jeńip, búgingideı dárejege jetip otyrmyn. Sizder muny balalaryńyzdyń bolashaǵy úshin jasap jatyrsyzdar, – dedi Qazaqstan Prezıdenti.
Sońynda Elbasy aýyldyń jańa turǵyndaryna zor densaýlyq, tabys, baq-bereke tiledi.
***
Jalpy 2018 jyly Soltústik Qazaqstan oblysyna 900 adamnan turatyn 235 otbasy kóship kelgen. Barlyǵy jaldamaly pátermen qamtamasyz etilip, jumysqa ornalastyryldy. Olardyń kóship kelýine jáne shyǵyndaryn óteý úshin 1 mıllıard teńgeden astam sýbsıdııa bólindi.
