Jasyratyny joq, qazir vokzalǵa barsańyz sergeldeńge túsken jolaýshylardan kóz súrinedi. Deni aqshasyna bılet tappaı álek. Jıynǵa qatysqan kóliktik baqylaý ınspeksııasy da, kólik polıseıleri de tártip ornatýda qaýqarsyz ekenderin moıyndaǵandaı. Jolserikter men poıyz basshylaryna qansha jerden shara qoldanyp jatsa da, «baıaǵy jartas – sol jartas». Kassalarda bılet joq bolǵanymen, jolserikpen kelisýge bolady, alaıda bılettiń baǵasy aspandap tur. Qajet deseńiz jolserik óziniń jatyn orny nemese úshinshi qabatty da bere salady.
Jıynda buǵan deıin birneshe ret «Jasyryn satyp alýshy» ádisimen júrgizilgen qoǵamdyq monıtorıngtiń qorytyndysy boıynsha naqty derekter keltirildi. Al temirjolshylar zań buzýshylyqtar oryn alyp otyrǵandyǵyn joqqa shyǵara almady.
«Qazaqstan Temir Joly» AQ Mańǵystaý oblystyq fılıaly júk tasymaldaý bólimshesiniń basshysy Nájmedın Ǵubashev qazirgi jaǵdaıdan habardar ekendigin jasyrmady. Turaqty túrde tekserister júrgizilip, jolserikterge jolaýshylardy bıletsiz tasymaldamaý jóninde udaıy eskertiletinin aıtty jáne aldaǵy ýaqytta bul jumystar jalǵasady dep sendirdi. Sonymen qatar jolaýshylar poıyzy vagondaryn jańartý boıynsha jumys istep jatyrmyz dedi.
Al oblystyq kóliktik baqylaý ınspeksııasynyń temirjol jáne sý kóligindegi baqylaý bólimi basshysynyń mindetin atqarýshy Qýandyq Aıapovtyń aıtýynsha, jyl basynan beri 38 jolaýshylar poıyzy tekserilip, 70 jolaýshyny bıletsiz tasymaldaǵan 17 jolserik ákimshilik jaýapkershilikke tartylǵan.
Elimizdiń 2015-2015 jyldarǵa arnalǵan sybaılas jemqorlyqqa qarsy strategııasyn iske asyrýdy syrtqy taldaý jáne baǵalaý jónindegi Mańǵystaý oblystyq arnaıy monıtorıngtik top tóraıymy Rýhııa Aldońǵarova, jolaýshylar poıyzyndaǵy sanıtarlyq jaǵdaıyn synǵa alyp, vagondardy jańartý qajettigin aıtyp ótse, onyń orynbasary Áset Manov qujatsyz, bıletsiz jáne rásimdelmegen júkterdi tasymaldaýǵa tosqaýyl qoıý kerektigin alǵa tartty. Sebebi bıletsiz júrgenderdiń arasynda asa aýyr qylmys jasap tergeýden nemese sottan boı tasalap, qarý tasymaldap nemese terrorıstik uıymdardyń músheleriniń júrmesine kim kepil bola alady degen másele kóterdi. Bul rette jolserikter bıletsiz jolaýshylar jáne rásimdelmegen júkter tasymaldaýyn doǵarmasa, bıýdjetke keltiriletin shyǵyndar taǵy bar.
Agenttiktiń aýmaqtyq departamentiniń basshysy jolaýshylar poıyzynyń brıgadırleri men jolserikterdi zańda kórsetilgen talaptardy oryndap, tártipke baǵynýǵa shaqyrdy.
"Bizdiń kózdegenimiz sizderdi jazalaý emes, kerisinshe ózderińizdi zańsyz áreketterge barmaýǵa shaqyrý. Ras, qazirgi jaǵdaı máz emes, sizderdiń ústilerińizden shaǵym aıtýshylar kóp. Ortada júrgen deldaldar da anyqtalady", dedi departament basshysy Nurgúl Jannazarova.
Qoryta aıtqanda jolserikter ózderiniń qyzmettik mindetterin, jolaýshylar men júkterdi tasymaldaý erejelerin óreskel buzý faktilerin doǵaratyn emes. Sol sebepti qoǵam ókilderi bıletsiz jolaýshylarmen kúreske baǵyttalǵan sharalardy áli de kúsheıtý kerek degen ustanymda.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
