Nıkolıa RÝChTI (Shveısarııa):
– Men burynnan da Azııa elderin jaqsy kóretinmin. Birneshe jyl Qytaıda turdym. Keıin Qazaqstanǵa barýǵa múmkindik týdy. Shynymdy aıtsam, burynǵy keńestik elderdiń biri bolǵandyqtan, sol zamannyń arhıtektýrasyn kóretin shyǵarmyn degen kúdik basym boldy. Áıtse de, Qazaqstannyń bas qalasyna kelgende, shahardyń sulýlyǵyna erekshe tamsandym.
«Tour de France»-qa jıi qatysatyn «Astana» velokomandasyn bizdiń elimizde kóp adam biledi. «Astana» velokomandanyń ataýy retinde ǵana qabyldanady. Biraq óz kózimmen kórgen soń, men qala týraly únemi aıtyp júremin.
Gabrıel MAKGÝAIR (AQSh):
– Men Ortalyq Azııanyń mádenıeti men ádebıetine qyzyǵyp, Qazaqstanǵa qazaq tilin úırený úshin bardym. Aldymen Ońtústik Qazaqstanda turdym. AQSh-qa ketpes buryn Astanada jumys isteý týraly oılana bastadym. 2007 jyly Astanaǵa qydyryp keldim. Áý basta qalada bıik ǵımarattar kóp, kóshede adam az bolǵany maǵan tańsyq kórindi, tipti, ǵylymı fantastıka sekildi boldy. Meni Qazaqstanda eń birinshi tańǵaldyrǵany – 20-dan asqan, jumysy, turaqty tabysy bar adamdardyń ata-anasymen turýy boldy. Bizde ata-anańdy tek demalys kúnderi kórýge baryp qaıtatyndyqtan, bul dástúr maǵan erekshe áser etti ári birden qurmetteýge laıyq úrdis eken dep oıladym. Sebebi bul týystyq qarym-qatynastyń beriktigin kórsetedi.
Hans DRISSER (Nıderlandy):
– Qazaqstannyń elordasy Eýropanyń eshbir qalasyna uqsamaıdy. Men ushaqtan túsken kezdiń ózinde qalanyń aýasyn jutyp turyp, erekshe rahattanǵanym esimde. Al qalanyń arhıtektýrasyn kórip, sheksiz fantazııanyń kýási boldym. Astana týraly estip – bilgen bir bólek, baryp qalany kórgen – tipten bólek. Astanada eski men jańa jaqsy úılesim tapqan. Astana bıznes úshin qolaıly. Jas, ádemi qala jańashyldyǵymen ózine baýrap áketedi.
Eloıza KLEChESKI (Fılıppın):
– Shetelge shyqqan saıyn jańalyqqa baıyp qaıtasyń. Tipti halyqtar arasyndaǵy uqsastyqtarǵa kez bolatyn sát te az bolmaıdy. Qazaqstanǵa barǵan saparymda osyndaı uqsastyqty baıqadym. Meniń oıymsha qazaqtar men fılıppındikter arasynda rýhanı jaqyndyq bar tárizdi. Mysaly, otbasylyq baılanys, týystyq qarym-qatynas, dostyqty qadirleý tárizdi ıgi qasıetter qos halyqqa ortaq qasıet ekenine kóz jetkizdim.
Ázirlegen Gúlnur QÝANYShBEKQYZY,
«Egemen Qazaqstan»
