Mańǵystaý oblysynda ótken bıylǵy baıqaýǵa óńirdegi 30-dan astam kásiporyn qatysyp, onyń 14-i kórmege ónimderin shyǵardy. Sondaı-aq baıqaýda tanymal kásiporyndarmen qatar kásibin jańadan bastaǵan taýar óndirýshilerdiń de ónimderimen tanysýǵa múmkindik týdy.
Mańǵystaý oblysy ákiminiń orynbasary R.Sakeev óńirdiń áleýmettik-ekonomıkalyq tynysyna toqtaldy.
– Mańǵystaý oblysy Qazaqstannyń eń qarqyndy damyp kele jatqan aımaǵynyń biri, eldiń ishki jalpy ónimi 5,6%- tin quraıdy. Jyl saıyn bizdiń oblysta orta eseppen 914 jańa kásiporyn ashylady. Qazirgi ýaqytta shaǵyn jáne orta bıznes sýbektileriniń sany 9505-ten asady. «Atameken» kásipkerlik palatasy kómegimen shaǵyn nesıe berý baǵdarlamalary, sonyń ishinde aýyl kásipkerlerin qarjylandyrý boıynsha aqparattandyrý jumystary júrgizilýde, − dedi aımaq basshysynyń orynbasary.
Mańǵystaý oblysynda 306 iri jáne orta bıznes sýbektisi bar. Údemeli ındýstrııalyq-ınnovasııalyq damýdyń memlekettik baǵdarlamasy boıynsha oblystyń Indýstrııalandyrý kartasyna 22 joba engizilgen. Qazirgi tańda óńirde Eýrazııalyq ekonomıkalyq qaýymdastyǵy (EýrAzEQ) men Dúnıejúzilik saýda uıymy (DSU) aıasynda joǵary sapaly ári básekege qabiletti ónimderdi shyǵarý basty nazarda.
− Memleket basshysy «Strategııa-2050» baǵdarlamasynda otandyq bıznesti ishki tabysty ósirýdiń eń mańyzdy kózi retinde belgiledi. Mańǵystaý kásipkerleri jańa bastamalardy belsendi túrde qoldaıtynyna senimdimin. Osylaısha olar ekonomıkanyń ósýine jáne halyqtyń ál-aýqatynyń odan ári jaqsarýyna úles qosady, − deıdi «Atameken» kásipkerler palatasy óńirlik fılıalynyń dırektory Nurbek Qarasaev.
Saraptamalyq komıssııanyń tańdaýymen «О́ńirlik maqsattaǵy úzdik taýarlar» atalymy boıynsha – «Kaspıı Bıtým» JShS, «Kaskor-Mashzavod» AQ, «Parker-Kazahstan» JShS top jarsa, «Halyq tutynatyn úzdik taýarlar» atalymynda «Janarys» JShS, «Jekenova Ásel» JK men «Domık» JK jeńiske jetti. Al «Úzdik azyq-túlik taýarlary» atalymy boıynsha júldelerdi «Selskohozıaıstvennyı kooperatıv «Segızbaı Ata» О́K men «Saýkymbek» JShS jáne «Bereket-F» JShS ıelendi.
Júldeger taýar óndirýshiler Mańǵystaý oblysy atynan kúzde Astana qalasynda ótetin «Qazaqstannyń úzdik taýary» respýblıkalyq baıqaýyna jáne «Qazaqstanda jasalǵan» kórmesine qatysatyn bolady.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
