Atalmysh kórmeniń mańyzy jaıly kópshilikti habardar etken oblystyq mýzeı basshysy Marǵulan Ospanov, bul shara Elbasymyzdyń «Rýhanı jańǵyrý» baǵdarlamasy aıasynda, sonymen qatar jýyqta atap ótilgen Astananyń 20 jyldyq mereıimen oraılas qolǵa alynyp otyrǵanyn, munda jetkizilgen ulaǵaty mol tarıhı-tanymdyq jádigerler elordalyqtardyń sanasyn jańǵyrtyp, zerdesin jetildirýge úlken áser eterin atap ótti.
Alǵash 1991 jyly shańyraq kótergen uly aǵartýshy atyndaǵy memorıaldyq mýzeı óz qoryna sol dáýirge tán 12 myń dana jádigerdi toptastyrǵan elimizdegi jalǵyz mekeme. Iаǵnı bul dúnıelerdiń arasynda óte qundy qoljazbalar, zattyq buıymdar, ákimshilik qujattar men fotoderekter bar.
Qostanaılyq aǵaıyn astanalyq kórermender úshin mýzeı qorynan tańdap alynǵan mańyzy zor degen jádigerlerdi ákelipti. Atap aıqanda, aǵartýshy Ybyraı Altynsarınniń bastamasymen mektep qurlysyn salý týraly Qostanaı ýeziniń bastyǵy Mıhaılovtyń málimdesi, 1884 jyly Qazan qalasynda jaryq kórgen atamyzdyń «Sharıǵatýl – ıslam» kitabynyń túpnusqasy, Ybyraıdyń atasy Balǵoja bıdiń nemeresine jazǵan haty, aǵartýshy dúnıeden ótkennen keıin onyń artynda qalǵan dúnıe-múlki týraly 1890 jyldyń 24 naýryz kúni toltyrylǵan tizim jáne marqumnyń «qaıtys bolǵany týraly» 1890 jyldyń 13 sáýir kúni artynda qalǵan jesiri Aıǵanys apamyzǵa berilgen kýálik, sonymen qatar áýlet shejiresi, Orynbor shekaralyq komıssııa tóraǵasyna Balǵoja bıdiń Ybyraıdy orys-qazaq mektebine qabyldatý týraly málimdemesi, Orynborda qazaq balalaryna arnap salynǵan mekteptiń maketi (bul mektepte 1850-1857 jyldary Ybyraı atamyz bilim alǵan), aǵartýshy-qaıratkerdiń 1889 jyly Qostanaı qalasyndaǵy eki klastyq qazaq-orys ýchılıshesiniń oqýshylarymen birge túsken portreti jáne onyń mektebinen túlep ushqan shákirtteri: Qorǵanbek Birimjanov, Ǵabdyǵanı Balǵynbaev, Ahmet Baıtursynov, Nurǵalı Quljanov, Spandııar Kóbeev, Beket О́tetileýov, Mirjaqyp Dýlatov, t.b. derekti dúnıelerin kórip, kózaıym boldyq.
Beken QAIRATULY,
«Egemen Qazaqstan»
