Án osylaı deıdi, janyńdy terbeıdi, júregińdi áldıleıdi. Án áserinen jamyraǵan juldyzdaı mazdaǵan sezim oty jan júregińdi jylytyp otyrǵan sátte eriksiz maqtanysh sezimi, atamekenge degen súıispenshilik qýaty taýdan aqqan tuma bulaqtaı óne boıyńdy sharlap, alpys eki tamyryńdy qyzdyrmasy bar ma?.. Ánshiniń de daýysy surapyl eken. Jańaǵy jalpaq dalada bir shókim merýertteı jalt-jult etken kól ústindegi qus tóresi – aqqýdyń únindeı syzylyp-aq tur.
Ánshi Aleksandr Agofonov – Qaraǵandy qalasynyń týmasy. Kókshetaýdaǵy Aqan seri atyndaǵy mádenıet kolledjiniń túlegi, qazirgi kúni Sandyqtaý aýdanyndaǵy aýyldyq mádenıet úıiniń dırektory bolyp qyzmet isteıdi. Kolledjde oqyp júrgen kezinde ánge kóńili aýǵan. Jalǵyz ynta ǵana emes, tabıǵı talant, ıakı daýys ta bar. Án bolǵanda Aleksandr Valentınovıchtiń súısinip, súıip aıtatyny kileń qazaq tilindegi patrıottyq ánder. Soltústik óńirde ózge jurttyń qazaqsha til syndyrǵanynyń ózi jetistik bolyp esepteledi. Al án salý ózgeshe óner. Onyń ishinde tyńdarmanyn keremet áserge bólep, qulaǵyńnan kirip, kóńilińde Otan súıý qasıetiniń dánin egetin ándi aıtý, el ishinde nasıhattaý, zamandastarynyń kókirek kózin ashý azamattyq.
– Repertýarymda osyndaı taqyryptaǵy júzden astam án bar, – deıdi Aleksandr Valentınovıch, – bizdiń Maksımovka selosynda áldeneshe ulttyń ókilderi turady ǵoı. Bári súıip tyńdaıdy. Uıyp tyńdaǵan soń maǵan da qanat bitip, aıta bergim keledi. Árıne, ár ánshi óziniń júrek qalaýymen taqyryp tańdaǵany, án tańdaǵany durys. Men osy patrıottyq ánderdi bar yntammen oryndaımyn.
Osy ólkede dúnıege kelip, at jalyn tartyp minip, dám-tuzyn tatqan Aleksandr baýyrymyzdyń nıeti jan dúnıemizdi eljiretip jiberdi. «Azamat bolsań, osyndaı bol!» dedik biz ónerimen ólkeniń órenderine el men jerdi qadirleýdi ánimen uqtyryp júrgen ánshige.
Baıqal BAIÁDIL,
«Egemen Qazaqstan»
Aqmola oblysy,
Sandyqtaý aýdany
