Dúbirli jyr báıgesine aıtyssúıer qaýymǵa tanymal ot aýyzdy, oraq tildi sýyryp salma 12 aqyn óleńmen órnektelgen sóz jarysyn qyzdyrdy.
Sózge júırik, oıǵa tapqyr, shashasyna shań tımes kileń júırikter kóneden kele jatqan ónerimizdi jańa qyrynan ulyqtap, táýelsizdiktiń araıly tańyn, el birligin jyrǵa qosty. Birin-birin zilsiz qaljyńdarmen túırep, ázil aralas shýmaqtardy tógiltti.
«Júırikten-júırik ozar jarysqanda» demekshi, kimniń jeńimpaz atanary árkimniń daıyndyǵyna baılanysty. Qazylar alqasy baǵyna emes, babyna qarap baǵalaıtynyna, eshqandaı bura tartýǵa jol berilmeıtinine senimdimin»– deıdi halyqaralyq «Alash» syılyǵynyń laýreaty Dáýletkereı Kápuly.
Jyr keshinde jurtshylyq qyzyǵa tamashalaǵan juptardyń biri qaraǵandylyq Maqsat Aqanov pen almatylyq jas aqyn Aıaýlym Jumabekqyzynyń qyz ben jigit aıtysy boldy. Basqa juptar da kópshiliktiń qoshemetine bólendi.
Qazylar alqasynyń biraýyzdy sheshimi boıynsha bas júldege tigilgen 700 myń teńge aqshalaı syılyqty Maqsat Aqanov ıelendi. Birinshi oryn men 500 myń teńge Rınat Zaıytovqa , ekinshi oryn men 300 myń teńge Aspanbek Shuǵataevqa, úshinshi oryn men 200 myń teńge Jarqyn Juparhanǵa buıyrdy.
О́zge jyr súıeıleri de aqshalaı syılyqtarmen, alǵys hattarmen marapattaldy.
О́mir ESQALI,
«Egemen Qazaqstan»
Soltústik Qazaqstan oblysy
