Qyrkúıek aıynyń 5-16 aralyǵynda Parıj qalasynda ótetin «L'Etrange Festival» fransýz kınofestıvaliniń arnaıy «Focus» baǵdarlamasynda rejısser Á.Erjanovtyń barlyq fılmderi kórsetiledi. Bul fılmderdiń qatarynda QR mádenıet jáne sport mınıstrliginiń tapsyrysymen Sh.Aımanov atyndaǵy «Qazaqfılm» kınostýdııasynda túsirilgen «Rıeltor», «Qojaıyn», «Tún qudaıy» syndy kartınalar bar.
Festıvaldi uıymdastyrýshylar óz tańdaýlary turǵysynda: «Erjanovtyń kınematografııasyn qaıtalanbaıtyn týyndylar quraıdy. Ol jumbaq álem sekildi jáne onyń sheksiz ınterpretasııasy men kreatıvtiligin tutastaı alyp baǵalaýǵa bolady. Bul jumbaq álemdi túsiný úshin onyń barlyq kórkem fılmderin jınaqtap, «Focus» baǵdarlamasynda kórsetý kerek», dep túsinik bergen.
Bul jaıynda rejısser Ádilhan Erjanov «L'Etrange» festıvali ózine «Qaratas aýylyndaǵy oba» fılminen keıin nazar aýdarǵanyn aıtady. «Olar «Tún qudaıy» fılmin kórsetýdi qalap, ony tutas bir jyl kútti. Bir jaqsysy, olar osynsha ýaqyt fılmdi kúte aldy. Biz de olarǵa jetkize alǵan sekildimiz. Menińshe, olar fılmderime eýropalyq kınosynshylardyń nazaryn aýdarǵysy keledi, sebebi, meniń fılmderim olarǵa qyzyqty. Olarǵa jańasha túsirilgen fılmder kerek», dep oı bólisti rejısser.
Aıta keterligi, «L'Etrange Festival» shırek ǵasyrǵa jýyq ýaqyt ótkizilip keledi. Bul festıval «erekshe, qaıtalanbaıtyn, sırek, joǵary deńgeıdegi» fılmderge arnalǵan.
Festıval baǵdarlamasynda negizgi baıqaý (Lars fon Trıerdiń «Djek turǵyzǵan úı» fılmi kórsetiletin) men qysqametrajdy fılmderdiń baıqaýynan bólek, baıqaýdan tys baǵdarlamada japon jańa tolqynynyń fılmderiniń kórsetilimi, ańyzǵa aınalǵan «Nikkatsu» japon stýdııasynyń fılmderiniń retrospektıvasy, sondaı-aq «Jańa talanttar», «Derekti kıno» baǵdarlamalary bar.
