Naqty aıtsaq, Elbasynyń «Prezıdenttiń bes áleýmettik bastamasy» atty halyqqa Úndeýinde aıtylǵan «Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý» bastamasy Áýlıeata óńirinde oryndalýda.
Taraz qalasyndaǵy Jambyl dańǵylynyń boıynda ornalasqan «Taraz» qonaqúıi budan bylaı Taraz ınnovasııalyq-gýmanıtarlyq ýnıversıtetiniń jataqhanasy bolady. О́tken ǵasyrdyń alpysynshy jyldary salynǵan bul ǵımarattyń jalpy aýmaǵy 7656,2 sharshy metrdi quraıdy. Atalǵan ýnıversıtet «Taraz» qonaqúıin óz qarajatyna satyp alyp, ǵımarattyń keı bólikterinde jóndeý jumystaryn bastap ta ketipti. Ýnıversıtettiń tárbıe jáne strategııalyq damytý jónindegi prorektory Sanat Áshirbekov aldaǵy ýaqytta bul ǵımarattyń 400 oryndyq Stýdentter úıine aınalatynyn aıtady.
Bıylǵy jyldyń ózinde 200 stýdent jataqhana alýǵa suranys beripti. Al kúzge qaraı taǵy 160 stýdentti úımen qamtý josparlanýda. Bul másele kezeń-kezeńimen sheshimin tabady.
Sanat Áshirbekovtiń aıtýynsha, ýnıversıtet basshylyǵy alǵashynda stýdentterge arnap jataqhana salýdy josparlaǵan eken. Alaıda tańdaý talaı jyl boıy kópshilikke qyzmet kórsetip kelgen «Taraz» qonaq-úıine túsipti. Búginde atalǵan ýnıversıtettiń ákimshilik-sharýashylyq qyzmetkerleriniń atsalysýymen nysannyń ekinshi jáne úshinshi qabattaryna aǵymdyq jóndeý jumystary júrgizilýde. Bul jumys kúz mezgilinde aıaqtalsa, odan keıin nysannyń shatyryn tolyq jańalaý úshin 200 mıllıon teńge kóleminde qarajat qarastyrý kózdelýde. Shatyry tolyq jóndeýden ótken soń tórtinshi jáne besinshi qabattarmen qatar, nysannyń ózge de bólikteri qaıta jańǵyrtylady. Qonaqúıdiń ár qabatyndaǵy 40 bólmeniń árqaısysyn eki adamdyq bólme retinde jabdyqtaý josparlanýda. Taraz ınnovasııalyq-gýmanıtarlyq ýnıversıtetine shetelden jáne elimizdiń ózge óńirlerinen kelip qyzmet atqaryp júrgen ǵalymdar men professorlardy, sondaı-aq jas mamandardy atalǵan oqý orny osy ýaqytqa deıin qyzmettik páterlermen qamtyp kelgen. Endi qaıta jańǵyrtylyp jatqan jataqhanadan olarǵa bólmeler beriledi eken.
Burynǵy «Taraz» qonaqúıi, búgingi Taraz ınnovasııalyq-gýmanıtarlyq ýnıversıtetiniń jataqhanasynda stýdentterdiń ózin-ózi damytýǵa arnalǵan kabınetter, sabaqqa daıyndalý, psıhologııalyq kómek kórsetý bólmeleri, ınternet-kafe, kitaphana, sportzal jáne túrli úıirmeler ashylady. Munyń bári jastardyń bos ýaqytyn tıimdi paıdalanýyna, sonymen qatar ózin-ózi damytýyna septigin tıgizbek. Jataqhanada turý aqysy stýdentterge qolaıly, óńirdegi ózge oqý oryndaryndaǵy jataqhana baǵasynan aspaıtyn deńgeıde belgilenetin bolady.
Hamıt ESAMAN,
«Egemen Qazaqstan»
Jambyl oblysy
