– MEGOGO-nyń kontent saıasatyndaǵy negizgi baǵyttarynyń biri – ár eldiń otandyq óndirisinen shyqqan fılmderdi halyqaralyq deńgeıde tanystyrý. Iаǵnı álemniń kez kelgen núktesinen qalaǵan eldiń qyzyqtyrǵan týyndysyn tamashalaýǵa taptyrmaıtyn múmkindik týdy degen sóz. Bul áleýmettik suraý salý negizinde júzege asyrylady jáne mádenı kózqaras turǵysynan óte mańyzdy,– deıdi Ortalyq Azııa beıneqyzmet kórsetý keńseleriniń bas dırektory Nurlan Shoqybaev. «Sońǵy jyldary qazaqstandyq kınoónim álemniń nazaryn aýdara bastady. Bizdiń de olarǵa usynatyn týyndylarymyz jetkilikti. Fılmderimizdiń barlyǵy dúnıejúziniń kınoteatrlaryna shyǵa almasa da katalogqa engizilgen mol usynys onlaın kórýge múmkindik beredi», – dep atap ótti N.Shoqybaev.
«Qazaqfılm» kınostýdııasy usynyp otyrǵan otandyq kınomuraǵat 150 fılmdi qamtyp otyr. Onyń ishinde – 148 kórkem fılm, 1 – derekti fılm («Mádenı mura» ataýymen 10-serııaly sıkl), 1– serıal («Astana, mahabbatym meniń» 12-serııaly). Keń aýqymdy kıno alańyna «Meniń atym Qoja», «Qyz ben jigit», «Bizdiń súıikti dáriger», «Taqııaly perishte», «Qyz Jibek», taǵy basqa fılmder jınaqtalǵan. MEGOGO men kınostýdııa arasynda bıylǵy 11 maýsymda bekitilgen kelisimshart talabyna sáıkes, kontent tek aqyly negizde ǵana qyzmet kórsetedi.
– Biz óz kontentimizdi MEGOGO alańyna shyǵarǵan sebebimiz, Qazaqstan kınostýdııasynyń ónimderine suranys joǵary. Fılmder qazaq jáne orys tilderinde kórsetiledi. Bul joba otandyq kınony nasıhattaý jolynda úlken ról atqarmaq,– deıdi «Qazaqfılm» AQ baspasóz qyzmetiniń jetekshisi Aınur Isaeva.
MEGOGO-nyń bir aıdaǵy aýdıtorııasyn 40 mln qoldanýshyny quraıdy. Katalogta 77 myńnan asa beınetaspa bar. Onyń 5 myńnan artyǵy kórkem fılm men serıal, 1500-den asa anımasııalyq fılm, 45 myń televızııalyq shoý, konsertter men mýzykalyq beınejazba, sondaı-aq 20 myńnan asa aqparattyq baǵdarlama bar. Halyqaralyq eń iri beıneqyzmet kórsetý ortalyǵy FOX, Universal, SONI, WaltDisney, MGM, Miramax, Warner, Broters, Paramount Pictures, BBS, Euronews, DiscoweryCommunications, Viacom sekildi áıgili stýdııalarmen kelisimshart jasasqan.
Aıgúl AHANBAIQYZY,
«Egemen Qazaqstan»
ALMATY
