El ishindegi elenbeı júrgen óner ıesi men qoly epti ismerlerdiń jáne kóshbasshy jastardyń tanylýyna jol ashqan osy festıvalde án shyrqalyp, kúı tartyldy. Otty jyr oqylyp, fotosýret baıqaýy da ótti. Úzdikter anyqtalyp, topjarǵandar oblys ákiminiń qolynan maqtaý qaǵaz ben baǵaly syılyqtar aldy. Osy kúni «Jetisy Style» jastar festıvaline jınalǵandar ǵana emes, jalpaq jetisýlyqtardyń tańdaıyn qaqtyrǵan qolóner ıesiniń atyna qanyq boldyq.
Nurlan Jartybekov esimdi jas jigit naǵyz toqymashy eken. Ol – ilmektep toqýdan álem rekordyn jańartqan jerlesimiz. Qapshaǵaı qalasyndaǵy «Baldáýren» respýblıkalyq oqý-saýyqtyrý ortalyǵynda toqyma páninen dáris beretin Nurlan ilmektep toqý óneri boıynsha dúnıe júziniń sheberlerin shań qaptyrypty. Mysalǵa, qolyńyzdaǵy toqymańyzdy kózińizdi jumyp otyryp jasaı alasyz ba? Múmkin emes pe? Al Nurlan arnaıy mamandardyń aldynda kózin tars baılap alyp rekord jasaǵan. Eptilik pen sáttiliktiń jarysynda ol 1 mınýtta 56 ret ilmek toqyp, has sheberlerdiń qasyn kergizipti. Ári bul jas toqymashynyń jalǵyz jetistigi emes. Jaqynda ǵana Nurlan jańa rekord jasady. Bul jolǵysy tipten ǵajap. Ilmektep toqýdyń sheberi 72 saǵat boıyna toqtamastan jumys istep, ıirilgen júnnen sharf toqyp shyqty. Toqyǵan moıynoramasynyń uzyndyǵy 35 metrge jetti. Bul – álemdegi áıgili toqyma sheberleriniń ózi munshalyqty az ýaqyt ishinde qol jetkizbegen jetistik eken.
Demek, 72 saǵatta 35 metr túbit bókebaı toqyǵan Nurlan Jartybekov naǵyz rekordshy emes pe? Toqymashy jigittiń eńbegin eskergen Almaty oblysynyń ákimi Amandyq Batalov oǵan arnaıy dıplom men statýetka syılady.
Qalmahanbet MUQAMETQALI,
«Egemen Qazaqstan»
Almaty oblysy
