QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamentiniń basshysy, Ádep jónindegi keńesiniń tóraıymy N. Jannazarovanyń aıtýynsha, sezd maqsaty – memlekettik organdardyń ashyqtyǵyn qamtamasyz etýde, sybaılas jemqorlyqqa qarsy «nóldik tózimdilikti» qalyptastyrýda qoǵamdyq keńesterdiń áleýetin keń kólemde paıdalaný máselelerin talqylaý.
Agenttiktiń aýmaqtyq departamenti tarapynan túrli eńbek ujymdarynda, oqý oryndarynda, áleýmettik qorǵaý salasynda, quqyq qorǵaý organdarynda, qyzmet kórsetý ortalyqtarynda, kásipkerler, basqa da maqsatty toptar arasynda zamanaýı sybaılas jemqorlyqqa qarsy zańnama talaptaryn túsindirý boıynsha jumystar júıeli túrde júrgizilýde. Qoǵam ókilderiniń belsendi atsalysýymen aýmaqtyq departament janynan sybaılas jemqorlyqqa qarsy mobıldik jáne arnaıy monıtorıng toptary qurylyp, jyldyń basynan beri densaýlyq saqtaý, arnaıy orta bilim jáne temir jol kóligi salasynda qoǵamdyq monıtorıng júrgizildi. Turǵyndarǵa aryz-shaǵym túsirýdi qoljetimdi etý maqsatynda arnaıy 8707 170 1424 shuǵyl jelisi ashylyp, áleýmettik jelilerdegi akkaýnttar ashyldy.
Aýmaqtyq departament basshysynyń aıtýynsha, Qoǵamdyq keńesterdiń quramynda bedeldi, memlekettik qyzmet, qoǵamdyq jumys, óndiris salasynda tájirıbeleri bar qoǵam qaıratkerleri bar. Sol sebepten, turǵyndardyń sybaılas jemqorlyqqa qarsy sanasyn kóterý jáne memlekettik qyzmettiń oń ımıdjin qalyptastyrý maqsatynda, Qoǵamdyq keńes músheleri jáne ardagerlermen birlesip jumys jasaý qajettigin basa aıtty.
Budan basqa, jýyrda «Qazaqstan Temir Joly» AQ oblystyq bólimshesinde arnaıy monıtorıng tobymen júrgizilgen qoǵamdyq baqylaý jumystary temirjol kóligi salasynda birshama máselelerdiń betin ashyp berdi. Ásirese jolserikterdiń bıletsiz jolaýshylardy 25.000 teńgege deıin kólemdegi aqyǵa poıyzǵa otyrǵyzýy, tehnıkalyq qyzmetkerlerdiń jolaýshylar men jolserikter arasynda baılanystyrýshy deldal qyzmetin atqaryp júrgendigin, vagondardyń elementarlyq sanıtarlyq-gıgıenalyq jaǵdaıynyń tómendigi qoǵam ókilderiniń nazaryna ilikti. Jalpy monıtorıng tobynyń maqsaty tek qana kemshilikterdi anyqtaý ǵana emes, sonymen birge qoǵamdyq sanany qozǵaý arqyly eń ózekti ári ótkir degen máselelerge bıliktiń nazaryn aýdarý.
Jıyn barysynda qozǵalǵan taqyryptyń biri - áleýmettik jelilerde qoǵam belsendileri nemese blogerler tarapynan memlekettik organdarǵa, ásirese aýdan, aýyl ákimdikterine qatysty synı pikirlerdiń kóp jazylýy. Ásirese, atalmysh Túpqaraǵan aýdanyna qatysty jurtshylyqty dúrliktirgen synı kózqarastaǵy materıaldar jelini toltyrýda. Demek, jergilikti ákimdikter rezonans týdyrýǵa jol bermeı, turǵyndardyń aryz-shaǵymdaryna der kezinde ári sapaly jaýabyn berip, máselelerin sheshýge bar kúshin salýlary qajettigi aıtyldy.
Mańǵystaý oblystyq máslıhatynyń depýtaty T.Ámirov Munaıly aýdany boıynsha sybaılas jemqorlyqtyń aldyn-alý boıynsha atqarylyp jatqan jumystarǵa toqtaldy.
Al Qoǵamdyq jáne Ádep jónindegi keńesterdiń múshesi Q. Erejepov bolsa, Ádep jónindegi keńeste qaralatyn máselelerdiń Qoǵamdyq keńestiń qyzmetimen birge ushtasatynyn, memlekettik qyzmetshilerdiń quqyqtarynyń qorǵalýyna úlken mán berilgendigin atap ótti.
Ádep keńesi jazalaýshy organ emes, kerisinshe memlekettik qyzmetshilerdiń tártibine baqylaý júrgizedi, sonyń ishinde jas memlekettik qyzmetshilerdiń quqyǵyn qorǵaýǵa baǵyttalǵan uıym ekendigin eske saldy.
Jıyndy qorytyndylaı kele, departament basshysy N. Jannazarova Qoǵamdyq keńes músheleri, ardager aǵalar, aq jaýlyqty analarmen turaqty túrde beıresmı formatta kezdesýler ótkizip, qoǵamda bolyp jatqan túrli jaıttar, ásirese sybaılas jemqorlyqqa qarsy is-qımyl, memlekettik qyzmettiń oń ımıdjin qalyptastyrý, memlekettik kórsetiletin qyzmetterdiń sapasyn kóterý, memlekettik qyzmetshilerdiń ádep erejelerin saqtaýyna qatysty máselelerdi talqylap, birlesip ortaq pikirge kelý qajet ekendigin aıtty.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
