Sapar barysynda senator aýdan ortalyǵy – Úlken Narynda ashylǵan Dostyq úıiniń jumysymen tanysty. «Kópultty elimizde tolerantty saıasattyń arqasynda dostyq pen tatýlyq ornyqty, bul elimizdiń damýyna úlken úles qosyp otyr»,- dep atap ótti D.Mýsın.
Aımaq halqymen júzdesýde D.Mýsın osy sessııada Elbasynyń 100 naqty qadam - Ult Josparyna baılanysty Parlament qabyrǵasynda seksen tórt Zań qabyldanǵanyn jáne olardyń bári eldiń áleýmettik-ekonomıkalyq jaǵdaıyn jaqsartýǵa baǵyttalǵanyn aıta kele, agrarlyq máselelerge qatysty zańnamalarǵa keńirek toqtalyp ótti. Azyq-túlik qaýipsizdigin, jer qoınaýyn paıdalaný, jer qatynastaryn retteý máselelerin qamtıtyn zańdarǵa engizilgen ózgerister men tolyqtyrýlardyń mánin ashty.
Jınalǵan turǵyndar ashyq áńgime barysynda memlekettik satyp alý, aýyl sharýashylyǵyndaǵy sýbsıdııalandyrý, shekaralyq koefısentti arttyrý boıynsha ózderin tolǵandyryp júrgen saýaldaryn ortaǵa saldy. Senator Juldyz aýylyna at basyn buryp, demografııalyq jaǵdaıdy retteý jáne jumyssyzdyq deńgeıin tómendetý baǵytynda elimizde júzege asyrylyp jatqan «Nátıjeli jumyspen qamtý jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy» aıasynda ońtústikten qonys aýdaryp kelgen otbasylardyń jaǵdaıymen tanysty.
Jarma aýdanynda da senator birneshe sharýa qojalyqtarynyń jumysymen tanysyp, turǵyndarmen kezdesti.
Kúrshim aýdanyndaǵy Marqakól, Boran, Marqa, Marqakól eldi mekenderindegi kezdesýlerinde senator agrarlyq máselelerge, shekaralyq aımaqty zamanaýı úrdiske saı damytý jáne onyń mártebesin arttyrý máselesine erekshe toqtaldy.
D.Mýsın Kúrshim aýdanyndaǵy shekara boıynda ornalasqan Marqa eldi mekenindegi «Aryn» qojalyǵynda bolyp, Marqakól aýyldyq okrýgi turǵyndarymen kezdesýinde shekaralyq aımaqty zamanaýı úrdiske saı damytýǵa kúsh salý kerektigin aıta kelip, shekara boıyndaǵy aýyl turǵyndary sanynyń kemip bara jatqanyna alańdaýshylyq bildirdi.
Senat depýtatymen kezdesýge kelgen aýyl turǵyndary halyqtyń aýyldan ketpeı, turaqtap qalýyn sheshý, mektepterdiń jabylýy, jer máseleleri, aýyl sharýashylyǵynda eńbek etetin kadrlardyń tapshylyǵy týraly jáne basqa da ózekti máselelerdi kóterip, usynys-pikirlerimen bólisti.
