Qaraǵandy shahtalaryn basqaratyn «ArselorMıttal Temirtaý» AQ bıylǵy jyldyń basynan beri eńbekkerlerdiń jalaqysyn 33,55%-ke arttyrǵan.
Qazaqstan Respýblıkasy Prezıdentiniń tapsyrmasymen «ArselorMıttal Temirtaý» aksıonerlik qoǵamyn damytýdyń 2018-2020 jyldarǵa arnalǵan Jol kartasy jasalyp, bul qujatqa Qazaqstan Respýblıkasynyń ınvestısııa jáne damý jónindegi mınıstri Jeńis Qasymbek, Qaraǵandy oblysynyń ákimi Erlan Qoshanov jáne atalǵan kompanııanyń bas dırektory Paramjıt Kalon qol qoıǵan bolatyn. Jol kartasyna sáıkes, «ArselorMıttal Temirtaý» úsh jyl ishinde Bolat, Kómir jáne Ken departamentteriniń óndiristik nysandaryna 305 mlrd. teńge ınvestısııalaıdy. Jyldarǵa shaqqanda, kompanııa bıyl 100 mlrd. teńge, 2019 jyly 105 mlrd. teńge jáne 2020 jyly taǵy 100 mlrd. teńge quımaq. Aıta ketý kerek, byltyr kompanııa tek 50 mlrd. teńge ınvestısııalaǵan bolatyn.
Osy qarajattardyń esebinen óndiris oshaqtary jetildirilip, materıaldyq-tehnıkalyq turǵydan jaqsartylyp, shahterler eńbegin qaýipsizdendirý sharalary júzege asyrylady. Indýstrııanyń 4.0 standarttary qoldanylady. Aldaǵy ýaqytta ásirese ekologııa máselelerine basa kóńil bólinbek.
Qaırat ÁBILDA,
«Egemen Qazaqstan»
QARAǴANDY
