– Biz 2025 jylǵa deıingi Strategııalyq damý josparyn qabyldadyq. «Nurly jol», «Nurly jer», «Sıfrlyq Qazaqstan», ındýstrııalyq-ınnovasııalyq damý memlekettik baǵdarlamalary jáne «Bes áleýmettik bastama» júzege asyrylyp jatyr. Munyń bári árbir qazaqstandyqtyń ómirin jaqsartýǵa baǵyttalǵan, – dedi Nursultan Nazarbaev.
Memleket basshysy nysandardy aralap kórip, memlekettik baǵdarlamalardyń iske asyrylýy jónindegi esepti tyńdaǵan soń, jalpy, aımaqtyń ekonomıkasy qarqyndy damyp kele jatqanyn jáne áleýmettik turaqtylyq qamtamasyz etilgenin aıtty.
Atyraý oblysynyń ákimi bıylǵy birinshi jartyjyldyqtaǵy óńirdiń áleýmettik-ekonomıkalyq damý qorytyndylary jóninde baıandady.
– Oblystyń óńirlik jalpy ónimi 2018 jylǵy birinshi toqsanda 1 646,2 mıllıard teńgege, ındeks kólemi 112,1 paıyzǵa jetti. Respýblıkanyń ishki jalpy ónimindegi óńirdiń úlesi 14 paıyz boldy. О́nerkásip óndirisiniń kólemi 3 653,1 mıllıardqa artty. Is júzindegi ındeks kólemi – 112,6 paıyz. Elimiz boıynsha óńirdiń úlesi 27,7 paıyzdy quraıdy. Jyl basynan beri 333,9 myń sharshy metr turǵyn úı paıdalanýǵa berildi. Bıyl Kásipkerlikti qoldaý kartasy aıasynda quny 21,8 mıllıard teńge bolatyn ári 331 jumys ornyn ashatyn 8 jobany iske qosý josparlanyp otyr, – dedi Nurlan Noǵaev.
Nursultan Nazarbaev oblystyń áleýmettik-ekonomıkalyq damýynyń birqatar baǵytyna qatysty oń nátıjelerge toqtalyp, óńir ekonomıkasy ósiminiń negizgi kórsetkishteri óndirýshi sektorǵa tıesili ekenin atap ótti.
– Men baǵasy qubylmaly shıkizat resýrstaryna úmit artpaı, balamaly óndiris qurýǵa arnalǵan ındýstrııalyq-ınnovasııalyq damý baǵdarlamasyn usyndym. Úlken kásiporyndar qurý mindetti emes, eksportqa jumys isteıtin ıkemdi jobalardy júzege asyrý qajet, – dedi Memleket basshysy.
Elbasy memlekettik qyzmetshilerdiń jalaqysyna qatysty pılottyq jobany júzege asyrýdyń tıimdiligin aıtyp, jergilikti atqarýshy organdarǵa osy tájirıbeni qoldanýdy, sondaı-aq sybaılas jemqorlyqqa qarsy kúresti kúsheıtýdi tapsyrdy.
Jıyn sońynda Qazaqstan Prezıdenti oblys ákimdigine jáne ortalyq memlekettik organdarǵa óńir ekonomıkasyn ártaraptandyrý, «Aqtóbe-Atyraý-Astrahan» avtomobıl jolynyń qurylysyn tezirek aıaqtaý, agrarlyq jáne qaıta óńdeý salasyn damytý, jańa jumys oryndaryn ashý, «Bes áleýmettik bastama» aıasyndaǵy jobalardy sapaly iske asyrý, sondaı-aq júktelgen mindetter úshin basshylardyń derbes jaýapkershiligin bekitý jóninde birqatar tapsyrma berdi.
