Jıynda sóz alǵan Investısııalar jáne damý mınıstrligi Avtomobıl joldary komıteti tóraǵasynyń orynbasary Amangeldi Bekov Memleket basshysynyń tapsyrmasyna sáıkes 2015 jyldan bastap halyqtyń ál-aýqatyn jaqsartýǵa, el ekonomıkasy men ınfraqurylymyn jańa deńgeıge kóterýge baǵyttalǵan «Nurly jol» memlekettik baǵdarlamasynyń júzege asyrylý barysyn tilge tıek etti. Onyń aıtýynsha, 2015-2017 jyldar kezeńinde «Nurly jol» aıasynda respýblıkalyq mańyzy bar 1,8 myń shaqyrymǵa jýyq avtojol salyndy jáne rekonstrýksııalandy. Al bıyl 4,2 myń shaqyrym jol jóndelip, 23 avtojol jobasynda qurylys jumystary joǵary qarqynmen júrgizilýde. Onyń ishinde 22 joba ótpeli, jalpy uzaqtyǵy 2900 shaqyrym bolatyn 10 joba halyqaralyq qarjy ınstıtýttarynyń zaımdary esebinen iske asýda. Osynyń nátıjesinde jyl sońynda 528 shaqyrymdyq jol qoldanysqa berilmek.
Jalpy «Nurly jol» jobalaryn iske asyrýǵa jergilikti jeli avtojoldaryn qosqanda 100 myń adam jumyldyrylǵan. Buǵan qosa, jol qurylystaryna tolyqtaı otandyq materıaldar qoldanylady.
Jıynda belgili bolǵandaı, atalǵan baǵdarlama boıynsha 4 myń shaqyrymnan astam joldy jóndeýge respýblıkalyq jáne jergilikti bıýdjetten 60 mlrd teńge kóleminde qosymsha qarjy bólingen. Al elimizdegi joldardy 2025 jylǵa deıin 85 prosentke jańartyp, taqtaıdaı tegistep otyrý úshin jyl saıyn bıýdjetten 150 mlrd teńge bólý kózdelgen.
Buǵan qosa, «Nurly jol» baǵdarlamasy negizinde jol boıyndaǵy qyzmet kórsetý nysandaryn damytýǵa erekshe nazar aýdaryldy. Búginde elimizde 1 859 jol boıynda qyzmet kórsetý nysany ornalasqan. Onyń 780-i, ıaǵnı 42 prosenti ulttyq standartqa sáıkes keledi. Aldaǵy ýaqytta qoldanystaǵy nysandardy jaqsartýmen qatar, jańa nysandar salý jáne ulttyq standart talaptaryna saı keletin «KazWay» modýldi pavılondaryn ornatý josparlanǵan.
Erkejan AITQAZY,
«Egemen Qazaqstan»
