Keńeske qatysqan Almaty qalasynyń ákimi Baýyrjan Baıbek 1 qyrkúıekte zamanaýı 1200 oryndyq mektep-gımnazııa ashylatynyn aıtyp, ustazdar qaýymyn qýantty. Tamyz keńesine qatysqan Májilis depýtattaryn bastap kelgen Gúlmıra Isımbaeva da ustazdarǵa jyly lebizin arnady.
Parlament Májilisi tóraǵasynyń orynbasary, «Nur Otan» partııasy fraksııasynyń jetekshisi Gúlmıra Isımbaeva bastaǵan top tamyz konferensııasynyń jumysyna qatysyp, qala muǵalimderimen kezdesti.
Kezdesý kezinde Gúlmıra Istaıbekqyzy Májilis jumysynyń keıbir qorytyndylaryna toqtaldy. Sonymen qatar jumys barysynda depýtattar áleýmettik salaǵa erekshe mán bergenin atap ótti. Máselen, ótken sessııa barysynda 84 zań jobasy maquldansa, 6-ýy bilim salasyn jáne balalardyń quqyǵyn qorǵaýǵa arnaldy. Onyń 3-eýi depýtattardyń bastamasymen ázirlendi. Olardyń qatarynda balalardyń densaýlyǵyna jáne damýyna zııan keltiretin aqparattan qorǵaýǵa baǵyttalǵan jáne joǵary oqý oryndarynyń akedemııalyq derbestigi týraly zańdar bar. Sondaı-aq bilim týraly zańǵa engizilgen ózgeristerge sáıkes, kolledj túlekteriniń bir mamandyq sheńberinde birden úsh biliktilik alýǵa bolatynyn, munyń ózi olardyń jumysqa turý múmkindigin molaıtatyny týraly da aıtty.
«Úshinshi parlamenttik sessııany tarıhı turǵydan mańyzdy dep aıtýǵa tolyq quqyǵymyz bar. О́ıtkeni dál osy Parlament qabyrǵasynda Elbasymyz alǵash ret bes áleýmettik bastamasyn jarııalady, onyń zańnamalyq qamtamasyz etilýine depýtattar barynsha belsendi qatysty», dedi depýtat.
Májilis tóraǵasynyń orynbasary G.Isımbaeva Elbasynyń «bilimdi damyta almaıtyn eldiń bolashaǵy joq» – degen sózin keltirip, ustazdyq qyzmettiń basty nysanasy sanalatyn bilim salasy memlekettiń tiregi, órkenıettiń aınasy ekenin, kelesi sessııada zań shyǵarýshylyq jumysynyń vektory Elbasynyń tapsyrmalaryn oryndaýǵa jáne elimizdiń pedagogterine barynsha qoldaý kórsetýge baǵyttalatynyn aıtty.
Saparbaı PARMANQUL,
«Egemen Qazaqstan»
ALMATY
