Atalǵan sharada memlekettik organdar ókilderi men kásipkerler bas qosyp, bıznesti kórkeıtýdiń jaı-japsaryn áńgimeledi. Máselen, qazaqstandyq bıznestiń halyqaralyq deńgeıdegi básekege qabilettiligi sóz bolyp, qolaıly bıznes ortany qalyptastyrý, ınfraqurylymǵa qoljetimdilik, kadrlar daıarlaý máselesi qaraldy. Sondaı-aq sıfrly júıege kóshýdiń mán-mańyzy, saladaǵy ózgerister men otandyq bıznestiń órkendeýi týraly aıtyldy. Mınıstrlik ókilderi men bilikti sarapshylar otandyq bıznestiń órkendeýine jol ashatyn máselelerdi saralady. Jıynǵa Ulttyq ekonomıka mınıstrligi, Astana qalasy ákimdigi, Strategııalyq bastamalar ortalyǵy, Ekonomıkalyq zertteýler ınstıtýty jáne «Atameken» kásipkerler palatasy ókilderi, taǵy basqalar qatysty.
Mundaı jıyn elimizdiń basqa da óńirlerinde ótkizilgen. Uıymdastyrýshylar bul joly at basyn Astanaǵa burdy.
«Astana qalasy shaǵyn jáne orta bıznesti damytý boıynsha kósh bastap tur. Áıtse de, bıznestiń úlesi áli de az. Nege únemi rýbldiń quldyraýyna, dollardyń qymbattaýyna táýeldimiz? Nege syrtqy saıasatqa baǵynyshty bolyp otyrmyz? Munyń barlyǵy ekonomıkamyzdyń turaqsyzdyǵyn kórsetedi. Al turaqty ekonomıka bolýy úshin turaqty bıznes kerek. Ekonomıkadaǵy shaǵyn jáne orta bıznestiń úlesi 50%-ke jetken kezde ǵana ekonomıkamyz turaqtanady. Al qazir respýblıka boıynsha bul kórsetkish bar bolǵany 27%-ti qurap otyr. Astana qalasy boıynsha ekonomıkadaǵy ShOB úlesi 45%, bul kórsetkishti arttyra túsý qajet», deıdi Strategııalyq bastamalar ortalyǵynyń jobalar jónindegi dırektory Baqytjan Sárkeev.
Dınara BITIK,
«Egemen Qazaqstan»
