Nursultan Nazarbaev joǵary deńgeıdegi turaqty kezdesýler eki taraptyń da strategııalyq seriktestikti odan ári nyǵaıtýǵa múddeli ekendiginiń aıqyn kórinisi sanalatynyn aıtty.
– Memleketterimiz arqyly ótetin Ámýdarııa men Syrdarııa ózenderi basseınderiniń máselelerin talqylaımyz. Bul eki ózen bizdiń balalarymyz ben nemerelerimizge ómir syılaıdy. Osy problemalardy birlese talqylaýdyń mańyzy zor, – dedi Nursultan Nazarbaev.
Memleket basshysy sammıttiń Túrikmenstanda der kezinde ótkizilip otyrǵanyna toqtalyp, Halyqaralyq Araldy qutqarý qorynyń buǵan deıingi sammıti 2009 jyly ótkenin atap ótti.
– Men baýyrlas Túrikmenstannyń damý barysyn jiti qadaǵalap otyramyn. Túrikmen halqyna bar jaqsylyqty tileımin, – dep túıindedi Qazaqstan Prezıdenti.
Gýrbangýly Berdimuhamedov Nursultan Nazarbaevqa iltıpat bildirip, Halyqaralyq Araldy qutqarý qorynyń quryltaıshy memleketteri basshylarynyń otyrysyna shaqyrýyn qabyl alǵany úshin alǵys aıtty.
– Qurmetti Nursultan Ábishuly, baýyrlas elderimizdi biriktiretin Kaspıı teńiziniń jaǵasyna – Túrikmenstanǵa qosh keldińiz! – dedi Túrikmenstan Prezıdenti.
Túrikmenstan basshysy Qazaqstan Prezıdentin Besinshi Kaspıı sammıtiniń tabysty ótýimen jáne tarıhı qujat – Kaspıı teńizine qatysty konvensııaǵa qol qoıylýymen quttyqtady.
Eki el kóshbasshylary Jol kartasyn iske asyrý, kólik-tranzıt salasyndaǵy yntymaqtastyqty damytý, sondaı-aq óńirlik qaýipsizdik máselelerin qarastyrdy.
Sońynda Gýrbangýly Berdimuhamedov Nursultan Nazarbaevty jáne barsha Qazaqstan halqyn Qurban aıt merekesimen quttyqtady.
