Qatysýshylar Buırataý, Baıanaýyl jáne Qarqaraly ulttyq parkterin aralady, Qumaı arheologııalyq kesheninde, Suńqar taýlarda, Ájibaı, Jasybaı jáne Shaıtankól kólderinde boldy. Olar Baıanaýyl tabıǵı parkindegi Toraıǵyr kóliniń tabıǵaty tamasha jaǵalaýynda aıaldady.
«Qazaqstanda 12 ulttyq tabıǵı park bar, olardyń úsheýi bizdiń baǵyttyń kartasynda atap ótilgen. Olardyń árqaısysy ózindik qaıtalanbas jáne biregeı sulýlyqqa ıe, osy sulýlyqty bastapqy kúıinde saqtaý árbir qazaqstandyqtyń isine aınalýy tıis», — dep oı bólisti ekspedısııa jetekshisi, QazaqGeography-diń halyqaralyq jáne ǵylymı jobalarynyń menedjeri Nurjan Alǵashov.
Budan ári baǵyt boıynsha eki ulttyq park bar: «Kókshetaý» tabıǵı parki jáne IýNESKO Dúnıejúzilik murasynyń tizimine kiretin Qorǵaljyń memlekettik tabıǵı qoryǵy.
Eske sala ketsek, shilde aıynda QR Mádenıet jáne sport mınıstrliginiń Týrızm ındýstrııasy komıtetiniń tapsyrysymen «Kazakh Tourism» UK uıymdastyrǵan Qazaqstannyń týrıstik áleýetin damytý boıynsha «Uly Dala Eline saıahat» aýqymdy jobasy bastaý aldy. Ekspedısııa elimizdiń asa mańyzdy alty baǵytyn qamtıdy jáne Qazaqstannyń 14 oblysynyń 11-inen ótedi.
«Saryarqa» baǵytynyń ekspedısııasyn Kazakh Tourism-men ózara yntymaqtastyq týraly memorandým aıasynda QazaqGeography júzege asyryp keledi. Baǵyttyń jalpy uzaqtyǵy 4000 shaqyrymdy quraıdy. Komanda quramynda saıahatshylar, televızııa jýrnalısteri, týroperatorlar men geografııalyq qoǵamdardyń ókilderi, fotograftar, sheteldik jáne qazaqstandyq trevel-blogerler, onyń ishinde Deonısıı Mıt, Erbolat Shadrahov, Elena Hachına men Ulan Álimbek bar. Ekspedısııa qorytyndylary boıynsha týrıstik obektilerdi aralaý boıynsha arnaıy baǵdarlama shyǵarylady.
«Uly Dala Eline saıahat» jobasynyń aıasynda taǵy eki baǵyt qaldy: Qyzylorda, Aqtóbe jáne Mańǵystaý oblystarynyń aýmaǵy boıynsha «Teńizden teńizge deıin» baǵyty jáne Túrkistan, Jambyl, Almaty oblystarynyń aýmaǵy boıynsha «Jańa jibek joly» baǵyty, oǵan «National Geographic Reseı» komandasy qatysady.
«Kazakh Tourism» UK QR Úkimetiniń qaýlysymen 2017 jylǵy shildede quryldy. Kompanııanyń negizgi mindetteri shetelde elimizdiń týrıstik áleýetin ilgeriletý, sondaı-aq Qazaqstannyń týrıstik salasyna ınvestısııalar tartý.
«QazaqGeography» qazaqstandyq ulttyq geografııalyq qoǵamy bes baǵytta jumys isteıdi: geografııa, klımat; qorshaǵan orta, tabıǵat resýrstary; bıoalýantúrlilik; týrızm, saıahat, ólketaný; tarıhı-mádenı mura, etnografııa. Qazirgi ýaqytta QR-da 11 ókildik ashylǵan.
