«Qazaqstan temir joly» UK»AQ-da QR ınvestısııa jáne damý mınıstrligi, Qazaqstan tasymaldaýshylary men vagon operatorlarynyń assosıasııasy, «QTJ-Júk tasymaly», «Qamqor-vagon», «Qaztemirtrans» kompanııalary ókilderiniń qatysýymen ótken otyrysta temir jol kóliginde qozǵalys qaýipsizdigin qamtamasyz etý máseleleri sóz boldy.
Jıynǵa qatysýshylar Azovelektrostal jáne Kremenchýg bolat quıý zaýytynan shyqqan búıir ramalarynan jınaqtalǵan júk vagondaryn aldaǵy ýaqytta paıdalaný máselelerine erekshe nazar aýdardy.
«QTJ» UK»AQ basqarma tóraǵasynyń qaýipsizdik jónindegi orynbasary Marat Shakenov júk vagondarynyń qozǵalys qaýipsizdigin qamtamasyz etý boıynsha máselelerdi birlese sheshý qajettiligin atap aıtty jáne ol Saryshaǵan –Shyǵanaq teliminde júk vagondarynyń joldan shyǵyp ketýine búıir ramasynyń synýy sebep bolǵanyn eske saldy.
Qazaqstan aýmaǵynda 2010 jyldan bastap búginge deıingi aralyqta búıir ramalarynyń 85 ret synýy men tesilý jaǵdaıy oryn alǵan bolsa, sonyń ishinde 33-i Kremenchýg bolat quıý zaýytynan shyqqan ramalar, al 25-i Azovelektrostaldiki boldy. 2018 jyldyń birinshi jarty jyldyǵynda vagon paıdalaný deposy jumysshylarynyń tehnıkalyq qyzmet kórsetýi kezinde 89 aqaýly búıir ramasy anyqtaldy. Atalǵan merzimde vagondardy josparly jóndeý kezinde aqaýy bar joǵy tekserilgen 36000 ramanyń 1412-siniń aqaýy bar bolyp shyqty, onyń ishinde 118 ónim «Azovelektrostalden» shyqqan, al 125-i Kremenchýg zaýytynyń ónimi. Sonymen 2011 jyldan beri «Qaztemirtrans» AQ 2008-2009 jyldary «Azovelektrostal» zaýytynda óndirilgen 3971 búıir ramasyn paıdalanýdan shyǵaryp tastady.
«QTJ-Júk tasymaly» AQ vagon sharýashylyǵy departamentiniń bas menedjeri Dýlat Bekturov temirjolshylar sapasyz búıir ramalaryn qoldanystan alyp tastaý úshin kerekti sharanyń bárin jasap jatqanyn aıtty. Alaıda bul detaldardy jeke operatorlar – «Istkomtrans» JShS, «BRK-Lızıng» AQ (enshiles), «Petroleum» JShS, «Mega-ınterkom» JShS, «Almaly» TK»JShS jáne basqalary qoldanýdy jalǵastyrýda.
Otyrysqa qatysýshylar aldaǵy ýaqytta sapasyz búıir ramalarynan jınaqtalǵan júk vagondarynyń paıdalanylýy týraly pikir almasty jáne qozǵalys qaýipsizdigin arttyrý, aǵymdy aǵytyp jóndeýdi júrgizý barysynda jumystyń tolyq sıklymen qamtamasyz etý boıynsha usynystaryn aıtty.
Jıynda vagon qurastyratyn ónimderdiń, sonyń ishinde búıir ramalarynyń sertıfıkasııasy men sapasy máselelerine basa nazar aýdartyldy.
Soǵan qosa temir jol kóliginde budan bylaı qaýipsizdikti nyǵaıtý salasynda zań bazalaryn jetildirý boıynsha usynystar da aıtyldy.
Otyrys qorytyndysy boıynsha Hattama toltyrylyp, qujat Qazaqstan tasymaldaýshylary men vagon operatorlarynyń assosıasııasyna joldandy.
