Osy oraıda 1 tamyz 30 qyrkúıek aralyǵynda «Jańa Ǵasyr» №175 gımnazııa qabyrǵasynda «Meniń tańdaýym – balalarǵa kómek kórsetý!» sharasy ótýde. Josparlanǵan is-sharalardyń ýaqytynda ótkizilýin qamtamasyz etýge baılanysty is-sharalar jospary bekitilip, ujym basshysy men ustazdary belsendi atsalysýda. Qazirgi kezde «Birinshi synypqa birinshi ret», «Birinshi synyp oqýshylaryna syılyq» jáne taǵy basqa sharalar qolǵa alynǵan.
Áleýmettik qorǵalmaǵan otbasy balalaryna «Angelher» tigin kompanııasynyń mektep formasy, «Imran» tigin kompanııasy sporttyq kıimderin tegin alýǵa múmkindik qarastyrylǵan. Áýezov aýdandyq bilim bólimi de birinshi synypqa keletin 20 oqýshyǵa mektepke qajetti quraldar, sómkeler, orta býyn oqýshylaryna mektep formalaryn taratty.
Áleýmettik pedagog Symbat Birimqulovanyń aıtýynsha, oqý jylynyń alǵashqy aıynda «Jaqsylyq jasaı bileıik», «Biz talapty baldyrǵan – úlgi alamyz jaqsydan», «Rııasyz jaqsylyq» taqyrybynda oqýshylarmen túrli pikir-talastar, synyp saǵattary, dóńgelek ústelder ótkizý josparlanýda. Búgingi kúni sonymen qatar, gımnazııanyń oqý-tárbıe isi orynbasarlarynyń jetekshiligimen «Taýgúl-3» yqshamaýdany aýmaǵyndaǵy kompıýterlik klýbtarda, oıyn-saýyq ortalyqtarynda kámelettik jasqa tolmaǵan jasóspirimderdiń keshki saǵat 20:00-den keıingi ýaqytta beı-bereket, qaraýsyz júrmeýin aldyn alý maqsatynda keshki tekserý sharalary júrgizilýde.
Elvıra Serikqyzy,
«Egemen Qazaqstan»
ALMATY
