Qazaqstan Prezıdenti joǵary deńgeıdegi turaqty kezdesýler eki taraptyń da strategııalyq seriktestikti odan ári nyǵaıtýǵa múddeli ekendiginiń aıqyn kórinisi sanalatynyn aıtty.
– Memleketterimiz arqyly ótetin Ámýdarııa men Syrdarııa ózenderi basseınderiniń máselelerin talqylaımyz. Bul eki ózen bizdiń balalarymyz ben nemerelerimizge ómir syılaıdy. Osy problemalardy birlese talqylaýdyń mańyzy zor, – dedi Nursultan Nazarbaev.
Qazaqstan basshysy sammıttiń Túrikmenstanda der kezinde ótkizilip otyrǵanyna toqtalyp, Halyqaralyq Araldy qutqarý qorynyń buǵan deıingi sammıti 2009 jyly ótkenin atap ótti.
– Men baýyrlas Túrikmenstannyń damý barysyn jiti qadaǵalap otyramyn. Túrikmen halqyna barlyq jaqsylyqty tileımin, – dep túıindedi Qazaqstan Prezıdenti.
Al Gýrbangýly Berdimuhamedov Nursultan Nazarbaevqa iltıpat bildirip, Halyqaralyq Araldy qutqarý qorynyń quryltaıshy memleketteri basshylarynyń otyrysyna shaqyrýdy qabyl alǵany úshin alǵys aıtty. Jáne Qazaqstan Prezıdentin Besinshi Kaspıı sammıtiniń tabysty ótýimen jáne tarıhı qujat – Kaspıı teńizine qatysty konven-
sııaǵa qol qoıylýymen quttyqtady.
Eki el kóshbasshylary Jol kartasyn iske asyrý, kólik-tranzıt salasyndaǵy yntymaqtastyqty damytý, sondaı-aq óńirlik qaýipsizdik máselelerin qarastyrdy.
Sońynda Gýrbangýly Berdimuhamedov Nursultan Nazarbaevty jáne barsha Qazaqstan halqyn Qurban aıt merekesimen quttyqtady.
Serik ÁBDIBEK,
«Egemen Qazaqstan» –
Túrikmenbashydan
