Partııa qoldaýymen jańa oqý jylynda aımaq mektepterinde 277 IT-synyp ashylady dep josparlanyp otyr. Onda oqýshylar veb-dızaın, robotty tehnıka, mehatronıka, baǵdarlamalaý negizderi jáne 3D modeldeý boıynsha tereńdetilgen bilim almaq. Máýlen Áshimbaev О́skemen qalasyndaǵy №46 mektepte óńirlik «Meniń mektebim» aksııasy sheńberinde ashylǵan osyndaı synyptyń birine arnaıy bardy. Jalpy, aldaǵy úsh jylda elimiz boıynsha partııanyń bastamasymen 1 myńnan astam tegin IT-synyp ashylyp, jylyna 150 myń jas sıfrly baǵytta bilimderin jetildiretin bolady. «Partııanyń muryndyq bolýymen Qazaqstanda osyndaı 1 myń synyp ashylady. Solardyń alǵashqylary, mine Shyǵysta iske kirisip otyr. Bul – qýantarlyq jaıt. Bul synyptarda oqýshylar bilimderin ushtap, keleshegi zor salanyń qyr-syryna qanyǵady», dedi ol.
Osy jerde Jas tehnık stansasynda oqıtyn atalǵan mekteptiń oqýshylary ózderi qurastyrǵan robottardyń «ónerin» kórsetti. Muǵalimdermen áńgimelesken partııa Tóraǵasynyń birinshi orynbasary IT-sabaqtardyń paıdasyna toqtalyp, bul baǵyttaǵy pánder balalardy kreatıvti oılaýǵa baýlıtynyn, bolashaqta búkil álem osy salany damytatynyn, Qazaqstan osy synyptar arqyly kóshten qalmaý qamyna kiriskenin jetkizdi.
О́skemen polıtehnıkalyq kolledjinde ashylǵan osyndaı IT-ortalyqqa barǵan partııa Tóraǵasynyń birinshi orynbasary mundaǵy oqytý tehnologııasymen tanysty. Atalǵan ortalyqta jergilikti jumyssyz azamattar baǵdarlamalaý negizderin meńgerip, ınjenerlik grafıka ázirleýge, beınemontaj jasaýǵa, derbes kompıýterlerdi dıagnostıkadan ótkizip, jóndeýge jáne robot tehnıkalarymen jumys isteýge mashyqtanady. Alǵashqy on turǵyn «EVM operatory» mamandyǵy boıynsha bilim alýǵa kirisip te ketken. Qysqa merzimdi kýrstar bir aıdan alty aıǵa deıin sozylady. «Bolashaqta IT-mamandarǵa degen qajettilik arta túsedi. Suranys qazirdiń ózinde de joǵary. Elimiz jappaı sıfrlandyrý baǵdarlamasyn qolǵa aldy. Bul baǵyttaǵy eń ózekti másele – bilikti mamandardyń tapshylyǵy. Osyndaı ortalyqtar atalǵan máseleni sheshýge septespek. Shyǵystyń atalǵan iste alǵash bolyp qadam jasap otyrǵany qýantarlyq», dedi M.Áshimbaev.
Bul IT-ortalyq óz túlekterin jumyspen qamtý úshin jergilikti jumys berýshi kompanııalarmen, kásiporyndarmen jáne atqarýshy bılik organdarymen tyǵyz baılanys ornatqan. Oblystaǵy ekinshi osyndaı ortalyq Semeıdegi elektr-tehnıkalyq kolledjdiń bazasynda ashylǵan.
«Nur Otan» partııasy Tóraǵasynyń birinshi orynbasary Máýlen Áshimbaev jumys sapary barysynda О́skemendegi «7 – 20 – 25» ıpotekalyq baǵdarlamasynyń qatysýshylarymen de kezdesti. Elbasynyń bes áleýmettik bastamasy aıasynda qolǵa alynǵan «7 – 20 – 25» baǵdarlamasy Shyǵysta qarqyndy iske asyp jatyr. О́skemendegi «Ertis Sıtı» atalatyn keshendegi úıler osy baǵdarlama boıynsha saýdalanýda. Atalǵan baǵdarlamaǵa ekinshi deńgeıli jeti bank seriktes atanyp otyr. Oblys turǵyndarynan 77 ótinim kelip túsken eken, solardyń 43-ine bankter nesıe berýdi maquldaǵan. Prezıdenttiń bes áleýmettik bastamasy aıasynda bekitilgen osy biregeı baǵdarlama boıynsha oblysta 430 páter satylýǵa ázir tur. Jyl sońyna deıin taǵy 800 páter daıyn bolýy tıis. Nesıeni ekinshi deńgeıdegi jeti bank berýde.
M.Áshimbaev «Arzan» dúkeniniń mańynda ornalasqan «Ertis Sıtı» turǵyn úı keshenine baryp, baspanaly bolǵan qala turǵyndaryn qonystoılarymen quttyqtady. Atalǵan keshende ıpotekalyq baǵdarlama boıynsha 30 páter saýdalanypty. «Búginde elimizde baspana máselesi basty problemalardyń biri bolyp otyr. О́tken jyly Qazaqstan boıynsha 11 mıllıon sharshy metr baspana turǵyzyldy. Desek te, áli de baspanaǵa zárý otandastarymyz bar. Buǵan deıingi baǵdarlamalardyń sharttary qıyn bolǵany da ras. Olardyń ósimaqysy da joǵary boldy, ári bastapqy tólenýi tıis mindetti soma 30-50 prosentti qurady. Osyǵan oraı Elbasy «7 – 20 – 25» atty biregeı baǵdarlamany ázirleýge tapsyrma bergen-di. Sol is mine, júzege asyp jatyr. Baspana – otbasy berekesiniń kepili. «Úıi joqtyń – kúıi joq» dep beker aıtylmaǵan ǵoı. Sizder osy baǵdarlamanyń arqasynda baspanaly bolyp otyrǵan alǵashqy azamatsyzdar. Qonystaryńyz qutty bolsyn!» dedi partııa Tóraǵasynyń birinshi orynbasary.
Azamat QASYM,
«Egemen Qazaqstan»
