Qatysýshylar Buırataý, Baıanaýyl jáne Qarqaraly ulttyq parkterin aralady, Qumaı arheologııalyq kesheninde, Suńqar taýlarynda, Ájibaı, Jasybaı jáne Shaıtankól kólderinde boldy. Saıahatshy Baıanaýyl tabıǵı parkindegi Toraıǵyr kóliniń tabıǵaty tamasha jaǵalaýynda aıaldady.
«Qazaqstanda 12 ulttyq tabıǵı park bar, olardyń úsheýi bizdiń baǵyttyń kartasynda atap ótilgen. Árqaısysy ózindik qaıtalanbas jáne biregeı sulýlyqqa ıe, osy sulýlyqty bastapqy kúıinde saqtaý ár qazaqstandyqtyń isine aınalýy tıis», deıdi ekspedısııa jetekshisi, QazaqGeography-diń halyqaralyq jáne ǵylymı jobalarynyń menedjeri Nurjan Alǵashov.
Budan ári baǵyt boıynsha eki ulttyq park bar: «Kókshetaý» tabıǵı parki jáne IýNESKO Dúnıejúzilik murasynyń tizimine kiretin Qorǵaljyn memlekettik tabıǵı qoryǵy.
Eske sala ketsek, shilde aıynda Mádenıet jáne sport mınıstrliginiń Týrızm ındýstrııasy komıtetiniń tapsyrysymen «Kazakh Tourism» UK uıymdastyrǵan Qazaqstannyń týrıstik áleýetin damytý boıynsha «Uly Dala eline saıahat» aýqymdy jobasy bastaý aldy. Ekspedısııa elimizdiń asa mańyzdy alty baǵytyn qamtıdy jáne Qazaqstannyń 14 oblysynyń 11-inen ótedi.
«Saryarqa» baǵytynyń ekspedısııasyn Kazakh Tourism-men ózara yntymaqtastyq týraly memorandým aıasynda QazaqGeography júzege asyryp keledi. Baǵyttyń jalpy uzaqtyǵy 4 myń shaqyrymdy quraıdy. Komanda quramynda saıahatshylar, telejýrnalıster, týroperatorlar men geografııalyq qoǵamdardyń ókilderi, fotograftar, sheteldik jáne qazaqstandyq trevel-blogerler, onyń ishinde Deonısıı Mıt, Erbolat Shadrahov, Elena Hachına men Ulan Álimbek bar. Ekspedısııa qorytyndysynda týrıstik nysandardy aralaý boıynsha arnaıy baǵdarlama shyǵarylady.
«Uly Dala eline saıahat» jobasynyń aıasynda taǵy eki baǵyt qaldy: Qyzylorda, Aqtóbe jáne Mańǵystaý oblystarynyń aýmaǵy boıynsha «Teńizden teńizge deıin» baǵyty jáne Túrkistan, Jambyl, Almaty oblystarynyń aýmaǵy boıynsha «Jańa Jibek joly» baǵyty, oǵan «National Geographic Reseı» komandasy qatysady.
«Egemen-aqparat»
