Sharanyń ashylý saltanatynda sóz alǵan oblystyq ishki saıasat basqarmasy basshysynyń orynbasary Aıdar Sadyrbaev «Jigit sultany» baıqaýy «Rýhanı jańǵyrý» baǵdarlamasynyń aıasynda osymen ekinshi márte uıymdastyrylyp jatqanyn, munyń aldynda Abaı aýdanynda «Aıaýly kelin» saıysy ótkenin aıtty. «Jastar básekege qabiletti bolýy úshin eń áýeli óz tarıhyn, tól mádenıetin, salt-dástúrlerin jaqsy bilýi qajet. «Rýhanı jańǵyrý» baǵdarlamasynyń da negizgi ózegi osy bolsa kerek. Saıysty ótkizýdegi maqsat – jastardyń boıyna ulttyq qundylyqtarymyzdy sińirý. Mundaı is-sharalar aldaǵy ýaqytta da jalǵasyn tabady», - dedi ol.
Kókpekti aýdany ákiminiń orynbasary Dáýren Qoıgeldın Jastar resýrstyq ortalyǵymen birlese otyryp bul sharany ótkizýge muqııat daıyndalǵandaryn, aýyl syrtyna kıiz úıler tigilip, altybaqan ornatylǵanyn jetkizdi. «Ár aýdannan kelgen jigitterdiń ónerinen bólek aýdan halqyna arnalǵan baǵdarlamamyz da bar. Ol baǵdarlamamyz báıge, buqa tartys, qoı kóterý, asyq atý, láńgi tebý syndy ulttyq oıyndarǵa qurylǵan», – dedi D.Qoıgeldın.
Qatysýshylar birinshi kezeńde teńge ilý, aýdaryspaq, qazaq kúresi, qol kúresi syndy ulttyq oıyn túrlerinen baq synady. Teńge ilý saıysynda 12 jigittiń tórteýi ǵana (Abaı, Zaısan, Kúrshim, Kókpekti) talap údesinen shyǵyp, jerde jatqan oraýly teńgeni kókke laqtyrdy. Bárinen de aýdaryspaq básekesi tartysqa toly boldy. Ásirese Tarbaǵataıdyń Aqjar aýylynan kelgen qarǵa boıly Abzal Bekbaevtyń qarymy kórermendi tánti etti. Ákki, ádisqoı Abzal birese qarsylasyn at ústinen julyp alsa, birese qýlyqqa basyp, qarsylasynyń aıaǵynan úzeńgiden shyǵaryp jiberip, basymdyǵyn tanytty. Ol aqtyq synda kúrshimdik Erasyl Ahmetovpen kezdesip, jeńip turyp jeńilip qaldy deýge bolady. Abzal ádettegideı óziniń súıikti ádisine salyp, qarsylasynyń aıaǵyn úzeńgiden shyǵaryp, ary aýdaryp jibergen. Attan qulady dep sengen bolýy kerek, ózi de jeńisine masattanyp jerge sekirip túsken. Sóıtse Erasyl attyń bir jaǵyna aýǵanymen, jerge aıaǵy tımegen eken. Sodan ne kerek, aýdaryspaq erejesi boıynsha kúrshimdik Erasyl jeńiske jetti. Qol kúresinde Kókpekti aýdanynyń Tassaı aýylynyń týmasy Saıahat Turlybekov sátti óner kórsete bildi. Al qazaq kúresinen ótken tartysta Aıbek Nuǵymarov, Muhıt Tursynov syndy ataqty balýandardyń jerinen kelgen Aıdos Úrkimbaev qarsylas shaq keltirmedi. Ekinshi kezeńde jigitter Qalıhan Altynbaev atyndaǵy aýdandyq Mádenıet úıinde bilimderi men biliktilikterin tarazyǵa saldy.
Sonymen, baıqaý qorytyndysynda bas júldeni ulylar mekeni - Abaı aýdanynan kelgen Aıdos Úrkimbaev ıelenip, «Jigit sultany» atanyp, at minip, shapan kıdi. Birinshi oryndy kókpektilik Saıahat Turlybekov, ekinshi oryndy zaısandyq Raýan Sahanov, úshinshi oryndy kúrshimdik Erasyl Ahmetov qanjyǵalaryna baılady.
Azamat QASYM,
«Egemen Qazaqstan»
Shyǵys Qazaqstan oblysy,
Kókpekti aýdany
Sýretterdi túsirgen – Darhan BERDIBEK
