Qala basshysy Baýyrjan Baıbek aıaqtalýǵa jaqyn jataqhanalar qurylysymen tanysty. Stýdentterdi jataqhanamen tolyq qamtamasyz etý úshin sońǵy úsh jylda 37 jataqhana salý josparlanyp otyr. Qala ákimdigi baspasóz qyzmetiniń málimeti boıynsha, bıyl qoldanysqa tórt jataqhana beriledi. Al 12 joǵary oqý ornynda 4,8 myń oryndyq jataqhana qurylysy úshin arnaıy ýchaskeler anyqtalǵan. Sondaı-aq qalada 19 jataqhana salý úshin jer telimderi berilip otyr.
B.Baıbek jumys sapary barysynda Bostandyq aýdanynda salynǵan 400 oryndyq alty qabatty jańa jataqhanamen tanysty. Búginde munda turǵyn jáne turmystyq bólmelerdi jıhazben jabdyqtaý jumystary júrgizilýde. Qazaqstan ınjenerlik-tehnologııalyq ýnıversıteti qala syrtyndaǵy stýdentterge arnalǵan turǵyn úıge qajettiniń barlyǵyn qamtamasyz etetin bolady.
S.Asfendııarov atyndaǵy QazUMÝ janyndaǵy 600 oryndyq toǵyz qabatty jataqhana qurylysy da aıaqtalýǵa jaqyn. Qazirgi ýaqytta alańy 11 myń sharshy bolatyn ǵımarattyń ishki árleý jáne kóriktendirý jumystary júrgizilýde.
Almatyda sonymen qatar «Almaty jastary» baǵdarlamasy jalǵasyn tabýda. Jas otbasylarǵa jeke turǵyn úı satyp alýǵa múmkindik berý maqsatynda bastapqy tólemsiz 5% mólsherimen 2 mlrd teńge qarastyrylǵan.
Sońǵy jyldary Almatyda turǵyn úı qurylysynyń qarqyny 4 esege ósip, kezekte turǵan árbir úshinshi turǵyn páterge ıe bolǵan. Al jýyq arada 17 myńnan asa páter salynatyn bolady.
Elvıra SERIKQYZY,
«Egemen Qazaqstan»
ALMATY
