Sonymen birge Ulttyq banktiń derekteri boıynsha, tamyz aıynyń ortasynda Shymkent qalasynda 662,6 mln teńgege turǵyn úı zaemdaryn alýǵa 77 ótinish kelip túsken.
Joǵaryda aıtylǵan málimetterdi Shymkent qalalyq qurylys basqarmasynyń bastyǵy Ábilseıit Rabaev «Prezıdenttiń bes áleýmettik bastamasynyń» júzege asyrylýyn baqylaý jónindegi Qoǵamdyq keńes músheleriniń qatysýymen ótken kezdesýde málim etti. Qoǵamdyq keńestiń músheleri – QHA Tóraǵasynyń orynbasary Vıtalıı Tvarıonas, Májilis depýtattary Azat Perýashev pen Berik Dúısembınov, «Qazaqstan-2050» jalpyulttyq qozǵalys keńesiniń tóraǵasy Muhtar Mankeev, Qazaqstannyń joǵary oqý oryndary qaýymdastyǵynyń prezıdenti Rahman Alshanov Shymkent qalasyna jumys sapary barysynda birqatar áleýmettik jáne iskerlik nysandardy aralap, óńirdegi «Prezıdenttiń bes áleýmettik bastamasynyń» júzege asyrylý barysymen tanysty.
«Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý» kózdelgen úshinshi bastama boıynsha Ońtústik Qazaqstan memlekettik pedagogıkalyq ýnıversıteti 8 gektar aýmaqta ornalasqan stýdenttik keshende jataqhanalar, sonymen qatar sporttyq-turmystyq keshender salýdy josparlap otyr. Qoǵamdyq keńestiń músheleri Stýdentter úıinde bolyp, jastardyń turmys jaǵdaıymen tanysty. Ýnıversıtettiń birinshi prorektory Barshagúl Isabektiń aıtýynsha, oqý ornynda 3,5 myńǵa jýyq stýdent oqıdy, al jataqhana qajettiligi 200 adamdy quraıdy. Bul kórsetkishke 500 oryndyq jańa jataqhana paıdalanýǵa berilýine baılanysty qol jetkizilgen.
Sondaı-aq respýblıkalyq keńestiń músheleri «Aqjaıyq» shaǵyn aýdanyndaǵy turǵyn úılerdiń qurylysymen tanysty. «Nurtas» shaǵyn aýdanynda ornalasqan «Sydyqov T.K.» jylyjaı kásipornynda boldy. Kásiporyn tórtinshi bastamada mindettelgen «Shaǵyn nesıe berýdi kóbeıtý» boıynsha tómen prosenttik nesıe túrinde 5 mıllıon teńge alyp, óndiristik qýatyn keńeıtken.
Shymkent qalasyndaǵy kásipkerler palatasynda, odan keıin qalalyq ákimdik ǵımaratynda ótken kezdesýler barysynda da bes áleýmettik bastamanyń júzege asyrylý barysy talqylandy. Respýblıkalyq qoǵamdyq keńes músheleriniń málimdeýinshe, aımaqtardaǵy jumys saparlary boıynsha jan-jaqty taldaý jasalady, onyń qorytyndylary Úkimetke usynylyp, Elbasyna esep beriledi.
Ǵalymjan ELShIBAI,
«Egemen Qazaqstan»
ShYMKENT
