Kıno álemi... Sezinip, túısine bilgen adamǵa ol jan rahaty, tárbıe quraly, ótken men búgingini, bolashaqty jalǵastyratyn altyn kópir ekendigi belgili.
Ústimizdegi jylǵy tamyz aıynyń bas kezinde «El arna» telearnasynan «Biz osynda turamyz» atty kınotýyndy kórsetildi. Erterekte kórgenimiz bolmasa, umytyp-aq qalǵandaı ekenbiz. Al myna kórinisten keıin ondaǵy oqıǵalar sanamyzda qaıta jańǵyrǵandaı boldy. Tanys beıneler – kınonyń korıfeıi Sháken Aımanov, metr akterlar Farıda Sháripova, Asanáli Áshimov t.b. oqıǵa keıipkerleri retinde sol kezdegi óndirdeı jas qalpynda kóz aldymyzda ótip jatty. Shynymyzdy aıtaıyq, qatty áserlendik. Esimizge jastyq shaǵymyz tústi. Bul kınonyń qudireti emeı nemene?! О́nerdiń ulylyǵy da osynda jatqan joq pa?
Bizder balalyq shaǵymyzda «Amangeldi», «Meniń atym Qoja», «Bizdiń súıikti dáriger», «Taqııaly perishte» t.b. da kınolentalardy kórip óstik. Olardaǵy keıipkerlerge uqsaýǵa tyrystyq.
Keıinirek «Qyz Jibek», «Atamannyń aqyry», «Transsibir ekspresi», «Bandyny qýǵan Hamıt» sekildi fılmder ómirge keldi. Bir ǵajaby sol, joǵaryda aıtqan shedevrlerdi qanshama ret kórsek te jalyqpaı, jańa tamashalap otyrǵandaı (qazir de solaı) áserge bólenemiz. Tap osyndaı dúnıeler kóptep túsirile berse eken deısiń.
Sońǵy jyldary túsirilgen «Jaýjúrek myń bala», «Birjan sal», «Qunanbaı» sekildi kórkem fılmder otandyq kınoındýstrııa salasyna olja salǵan ortaq qazynamyz.
Barǵa qanaǵat dep aıtaıyq, qazir ne kóp fılm kóp, sheteldikin aıtpaǵannyń ózinde. Olardy kópsinip otyrǵanymyz joq, tek qana keıbiriniń sapasy men mazmunyna kóńilimizdiń tolmaıtyny bolmasa.
Otandyq teleserıaldardyń da óz kórermenderi bar. Bizdiń aıtqaly otyrǵanymyz basqa nárse.
Shekten tys kóp nárseniń qadiri bolmaıtyny belgili. Osy oraıda qazirgi tańda kıno túsiretin jekemenshik stýdııalar kóbeıdi. Keıbir oblys ortalyqtarynda ashylǵan nemese ashylyp jatqan osyndaı stýdııalardy aıtpaǵannyń ózinde, qaltaly keıbir azamattarymyz da kıno túsiretin bolyp júr. Túsirsin, tek qana sapasyna mán bersin, mazmuny men tárbıelik jaǵyna kóńil aýdarsa bolǵany.
Al ondaı bıik deńgeıdegi, talapqa saı dúnıeler qansha bolsa da bizge kóptik etpesi anyq.
Kóńilde bir ǵana qaýip bar. Kınonyń qunyn tómendetip almas pa ekenbiz degen...
Al, Siz qalaı oılaısyz?
Káribaı ÁMZEULY,
zeınetker
Túkistan oblysy,
Sozaq aýdany
