Sporttaǵy alǵashqy qadamyn karateden bastaǵan Iýsýf Raısov sheberligi tolysy kele qoıan-qoltyq aıqas jáne jaýyngerlik sambodan ótken túrli jarystarda baq synady. Keıinnen erejesiz jekpe-jekke aýysyp, birqatar bıik belesterdi baǵyndyrdy. Osy kúnge deıin kásipqoılar arasynda 14 kezdesý ótkizip úlgergen 23 jastaǵy Reseı azamaty 13 ret jeńiske jetti. Ol 2016 jyldyń jeloqsan aıynda Marat Balaevtan upaı sanymen utylǵan bolatyn. Arada bir jarym jyldaı ýaqyt ótkende dál sol qarsylasyn birinshi raýndta «qylqyndyrý» ádisimen aıqyn utqan Raısov ASV uıymynyń chempıondyq ataǵyn ıelendi. Osy jeńisinen keıin ol 70 kılo salmaq dárejesine aýysatynyn málimdedi.
Bul meniń Qazaqstanǵa birinshi ret kelýim emes. 2014 jyly Astanada ótken «M-1 Challenge 48 – Battle of Nomads» týrnırinde baq synap, óz qarsylasymnan basym túsken edim. Sodan beri biraz ýaqyt ótti. Desek te qazaqtardyń qonaqjaılyǵyna tántimin. Sizderde de osy sport túrine degen qyzyǵýshylyq erekshe. Ásirese, maǵan Arman Ospanovtyń óneri unaıdy. Ekeýimiz birer jyldan beri tanyspyz. Ol jaqsy azamat, óte myqty sportshy. Shavkat Rahmonovty da erekshe atap ótkim keledi. Bul jigittiń de bolashaǵy zor. Sondaı-aq, jeńil salmaqta kúsh synasyp júrgender arasynda da Qazaqstanda jaqsy jaýyngerler jeterlik, – deıdi Iýsýf Raısov.
Almatynyń aldynda Iýsýf Qaraǵandy qalasynda bolyp, sol jerdegi jigittermen birlesken jattyǵý ótkizgen bolatyn. О́ziniń kelesi jekpe-jegin Reseı sportshysy ústimizdegi jyldyń 10 qarashasynda Máskeýde Ulybrıtanııanyń ókili Andre Vınnerge qarsy ótkizedi.
Ǵalym SÚLEIMEN,
«Egemen Qazaqstan»
ALMATY
