«Eri jomart eldiń qyzy jetim bolmaıdy». Alaıda resmı statıstıkaǵa súıensek ata-ana qamqorlyǵynsyz qalǵan jetkinshekterdiń sany az emes. Olarǵa jan-jaqty qoldaý kórsetý barlyq qoǵam músheleriniń mindeti. Jetkinshekterdi jetistikke jetelegen bul týrnırdiń de basty maqsaty osy.
Jarys qorytyndysyna sáıkes 13-16 jas aralyǵyndaǵy tennısshiler saıysynda Rýdnyı qalasynan kelgen Olga Kım jeńimpaz dep tanyldy. Tennıs sportyn es bilgeli janyna serik etip kele jatqan qarshadaı qyzdyń armany álem chempıony ataný. Taǵdyr tálkegin kórgen jasóspirimderdi qanattandyryp, bolashaǵyna jol ashýdy kózdegen «pıng-pong» hanshaıymy týrnıri Olganyń osy armanyn jaqyndatqandaı boldy.
О́ıtkeni qatarlastarynan dara shyqqan órimdeı qyz 9 ben 12 jas aralyǵyndaǵy tennısshiler tartysynda top jarǵan Qaraǵandydaǵy «Tańsholpan» balalar úıiniń tárbıelenýshisi Evgenııa Týzovamen birge Shanhaı qalasyndaǵy sport mektebine barýǵa múmkindik alyp otyr. Úmit artqan qos qyzymyz Shanhaıdaǵy tájirıbeli mamandardan arnaıy sheberlik dáristerin úırenbek. Byltyr dál osy múmkindik týrnırdiń ótken jylǵy jeńimpazdary Marııa Zamotoılo men Laýra Mýhametjanovaǵa buıyrǵan edi. Qytaı astanasy Beıjińge baryp bir apta boıy tájirıbeli mamandardan sabaq alǵan sportshy qyzdar úlken sporttyń qyr-syryna qanyǵyp qaıtqan edi.
Týrnır uıymdastyrýshylary buǵan deıin de jastardyń sportqa degen qyzyǵýshylyǵyn oıatý maqsatynda elimizdiń túkpir-túkpirindegi 100 jetimder úıine 100 tennıs oınaıtyn ústel men sporttyq jabdyqtar syıǵa tartqan bolatyn. Endi balalar úıiniń tárbıelenýshileri olımpıadalyq sport túrine enetin ústel tennısin oınap, erkin jattyǵý jasap sheberlikterin shyńdaı alady.
Jarystyń saltanatty jabylý rásimi kezinde týrnırge qatysýshy barlyq balalarǵa maqtaý qaǵazdary men syı-sııapattar tabystaldy. Jeńimpazdardy quttyqtaýǵa arnaıy kelgen Almaty qalasynyń maslıhat depýtaty Asylhan Tólepov, Nur Otan partııasynyń Almaty kalalyq bólimshesi tóraǵasynyń orynbasary Qaıym-Munar Tabeev, áıgili balýan Islam Baıramýkov jas sportshylarǵa sáttilik tiledi.
Arman OKTIаBR,
«Egemen Qazaqstan»
ALMATY
