QANDAI TÚIINDI DE TARQATATYNYNA QAZAQSTANDYQTAR TAǴY DA KО́Z JETKIZDI
EL QAZYNASY – BIRLIKTE
Alysty jaqyn, jatty el etetin ata saltyna halqymyz qashannan adal. Qandaı qıyn-qystaýlarda da naızanyń kúshimen emes, tildiń ushymen jol tapqan elmiz. Yntymaq pen birlik – atadan balaǵa amanat bolǵan eń bir qymbat qundylyqtarymyz, baılyǵymyz, baǵymyz. Búgingi urpaqtyń keıingige osynaý yntymaq pen birlik murasyn tapsyrýy – babalar aldyndaǵy qaryzy, balalar aldyndaǵy paryzy bolmaq. Elbasy Mańǵystaý oblysynda bolǵan kezinde osy máselelerge basa nazar aýdardy. Elimizdiń memlekettiginiń tiregi de, uıytqysy da – qazaq halqy. Endeshe, alash jurty Qazaqstandy óz Otanym dep sanaıtyn júzden astam ulystarǵa tatýlyq úlgisin kórsetýi abzal. Qudaıǵa shúkir, osynaý izgi bıikten qazaq halqy tómendegen emes. Ásirese, Táýelsizdikke qol jetkizgennen beri qasterli birligimiz artpasa, kemigen joq. Jas urpaq tárbıesimen aınalysatyn bolǵandyqtan, men jáne áriptes ustazdarym sabaqta da, sabaqtan tys ýaqytta da shákirtterdiń boıyna qazaq ultynyń, Qazaqstan halyqtarynyń jáne álem elderiniń ózara dostyǵyn qurmetteý sezimin darytý jolynda aıanbaı eńbek etýdemiz. Bul – bizderdiń Qazaqstan táýelsizdigin nyǵaıtýǵa qosar asa úlken úlesimiz. Qazaqstan Respýblıkasynyń ekonomıkalyq, saıası-áleýmettik turaqty damýyn oqý úrdisinde, tárbıe jumystarynda negiz etip alatynymyzdy maqtanyshpen aıta alamyz. Bul oraıda ustazdardy yntymaq pen birlik jarshysy desek te bolady jáne ol – ustazdyq murat. Yntymaq pen birlik negizin mektep qabyrǵasynda qalyptastyrý – bizderdiń patrıottyq boryshymyz. Aınaldyrǵan 20 jylda qýatty memleketke aınalǵan Táýelsiz Qazaqstannyń damý aıasynda buryndy-sońdy tarıh bilmegen uly jetistikterge jetip otyrmyz. Bizdiń kóshimizdiń durys ekenine tarıh – kýá, ýaqyt – tarazy. Bizdiń Qazaqstannyń órkendeý baǵyty durys ekenin búkil qazaqstandyqtar maqtan tutady, ony kóziniń qarashyǵyndaı qorǵaıdy. Uly Táýelsizdikke qol kóterýge eshqashan eshkimge de jol berilmeıdi. Aıagúl MIRAZOVA, Y.Altynsarın atyndaǵy №159 gımnazııanyń dırektory, Qazaqstannyń Eńbek Eri. ALMATY.
