Batys Qazaqstan bilim basqarmasynyń basshysy Sholpan Qadyrova búgin Aqjaıyq aýdany Taıpaq aýyldyq okrýgine qatysty Shabdarjap aýylynda ashylǵan jańa mekteptiń alǵashqy qońyraý saltanatyna arnaıy qatysty. Oblys ortalyǵynan shalǵaı jatqan shaǵyn aýyl mektebiniń bilim jetistigi erekshe – byltyr mektep bitirgen 8 oqýshynyń úsheýi – «Altyn belgige» ıe bolsa, jeteýi – memlekettik grant utyp, stýdent atanǵan. Osyndaı bilimqumar balalary bar aýylǵa «Qarashyǵanaq Petroleým Opereıtıng» BV kompanııasynyń qoldaýymen 198 oryndyq jańa mektep ǵımaraty salynyp, búgin alǵashqy qońyraý kúmbirledi. Aýyldyń bolashaǵy bar ekeni kórinip tur, oqýshy sany da kóbeıip keledi. Mysaly, bıyl birinshi synypqa 13 búldirshin kelipti. Aıta keteıik, atalmysh mektep óńirdegi ózge de shalǵaı aýyl mektepteri sekildi «Bilimbook» jabdyǵymen tolyq qamtylǵan.
- Biz jyl saıyn bilim salasyn jetildirý maqsatynda bilim oshaqtarynyń materıaldyq negizin jaqsartyp qana qoımaı, aýdan mektepterin kúrdeli jóndeý jáne jańa ǵımarat salýdy kezeń kezeńimen júzege asyryp kelemiz. Búgin mine, jańa mekteptiń ashylýyna kýá bolyp otyrsyzdar. Sondaı-aq, aýdan ortalyǵynda Abaı atyndaǵy mektep gımnazııasynyń 300 oryndyq ǵımaraty jáne 100 oryndyq ınternaty salynady. Bıyl Aqjaıyq aýdany boıynsha 664 búldirshin mektep tabaldyryǵyn alǵash attap otyr, - dedi Aqjaıyq aýdanynyń ákimi Ádil Jolamanov Shabdarjap mektebiniń ashylý saltanatynda.
Batys Qazaqstan oblystyq bilim basqarmasynyń basshysy Sholpan Qadyrovanyń málimetinshe, óńirde 380 memlekettik mektep bar. Jylma-jyl oqýshy sany ósip keledi. Oqýshy sany ósýine baılanysty Terekti aýdanyndaǵy Eńbek orta mektebi men Qaztalovtaǵy Kópkútir bastaýysh mektebi bıyl negizgi mektep bolyp qaıta qurylǵan. Al Syrym aýdanynda Jańaómir bastaýysh mektebi bala sany azaıýyna baılanysty jabyldy. Sholpan Maratqyzy shekaralyq óńirdegi mektepterdi saqtap qalýǵa erekshe kóńil bólinip otyrǵanyn jetkizdi. Basshynyń aıtýynsha, qajetti mektep oqýlyǵy oblysqa tolyq kólemde jetkizilgen.
Dál osy kúni Batys Qazaqstan oblysynda Zelenov aýdanyna qarasty Darııan aýylynda jańa mektep ınternatymen, Bókeı ordasy aýdanynyń Saıhyn aýylynda mektep ınternatynyń jańa ǵımaraty, Qaztalov aýdanynda saz mektebiniń ǵımaraty paıdalanýǵa berildi. Sholpan Maratqyzy jyl sońyna deıin Oral qalasynda taǵy bir mektep ǵımaraty ashylatynyn aıtady.
Batys Qazaqstan oblysy mektepterinde byltyr 12 260 muǵalim sabaq berse, bıyl jańadan 248 jas maman jumysqa qabyldanǵan. О́ńirde muǵalim tapshylyǵy áli bar – taǵy 205 pedagog qajet. О́ńirdegi maman tapshylyǵyn joıý úshin jergilikti bıýdjetten qarjy bólinip, bıyl 100 jas oblys ákiminiń grantyna ıe boldy. Olardyń biraz bóligi – bolashaq mektep muǵalimi.
Aqjaıyq aýdanynyń ákimi Ádil Jolamanovtyń aıtýynsha, óńirde «Balapan» baǵdarlamasy boıynsha 0-6 jas aralyǵyndaǵy balalardyń 99,9 paıyzy oqý jáne tárbıemen qamtylyp otyr. Bıyldyń ózinde «Dıplommen aýylǵa» baǵdarlamasy aıasynda aýdanǵa 15 jas muǵalim jumysqa ornalasqan. Balalardyń jazǵy demalysyn uıymdastyrýǵa jergilikti bıýdjetten bólingen qarjy 11 paıyzǵa kóbeıip, oqýshylardyń 100 paıyzy jazǵy demalyspen qamtylǵan. Ulttyq biryńǵaı testileý nátıjesinde Aqjaıyq aýdany boıynsha ortasha ball 76,96 paıyzdy qurap, 131 oqýshy memlekettik grantqa ıe boldy. Onyń ishinde 22 túlek «Altyn belgige», 6 oqýshy «erekshe attestatqa» bitirdi.
- Tabıǵı gazge qosylǵan 9 mektep janynan jylyjaı ashyp, balalarymyzdy arzan, ári sapaly baý-baqsha ónimderimen qamtyp, ári eńbekke baýlyp jatyrmyz. 24 mektepte oqýshylardyń óndiristik brıgadasy bar. «Mektepke jol» respýblıkalyq aksııasy aýdanda keń kólemde uıymdastyrylyp, 680 oqýshyǵa kásipkerler arqyly 3 mln 200 myńnan astam teńgeniń kómegi kórsetildi. Aýdanymyzda 14 mektep janynda murajaı jumys jasaıdy. Taıaý bolashaqta Q.Baısyqov atyndaǵy, Talap, Almaly mektepterinde mýzeı ashylady, - deıdi Ádil Taýfıquly.
Qazbek QUTTYMURATULY
«Egemen Qazaqstan»
Batys Qazaqstan oblysy
