Jalpy, bıylǵy oqý jylynda aımaq boıynsha jańa qonysqa kóshken mektep oqýshylarynyń qýanyshy oblys ortalyǵynda eki eselendi dese de bolǵandaı. Bilim kúni Taldyqorǵan qalasynda da qos mektep paıdalanýǵa berilip, alǵashqy qońyraý saltanaty ótti. Oqýshylardyń qýanyshyn bólisýge oblys ákimi Amandyq Batalov kelip, bilim ǵımaratynyń tusaýkeserine qatysty.
– Búgin óńirde 45 myńǵa jýyq bala alǵash ret mektepke qadam basyp otyr. Bizdiń keıbir aýdandarymyzda 45 myń halyq turady. Iаǵnı búgin mektepke tutas bir aýdannyń turǵyny keldi deýge bolady. О́te qýanyshty jaǵdaı. Elimizdegi turaqtylyqtyń arqasynda ultymyz órkendep, urpaq sanynyń artyp kele jatqandyǵynyń kórinisi. Biz óz tarapymyzdan oblysta balalardyń bilim alýyna jaǵdaı jasaýǵa tıispiz. Buǵan tolyq negiz bar. Mine, jańa oqý jylyna 7 mektep paıdalanýǵa berilip otyr. Jalpy 22 oqý ǵımaraty 6,8 mlrd teńgeden astam qarjyǵa kúrdeli jáne aǵymdaǵy jóndeýden ótti. Al Jetisýda mektep salý isi jalǵasa beredi. Jyl sońyna deıin taǵy 2 mekteptiń qurylysy aıaqtalady. Taldyqorǵan qalasynda 300 oryndyq mýzyka mektebiniń qurylysy aıaqtalýǵa jaqyn. Osynyń barlyǵy urpaqtyń sapaly bilim, sanaly tárbıe alýy úshin memleket tarapynan jasalǵan qamqorlyqtyń úlgisi, – dedi oblys basshysy Amandyq Batalov oqýshylarmen kezdesý kezinde.
Taldyqorǵan qalasynda qoldanysqa berilgen 2 mektep te 1200 oqýshyǵa arnalǵan. Qazir qala turǵyndarynyń qatary ósip, áleýmettik nysandarǵa suranys jyl saıyn artyp keledi. Onyń ústine Taldyqorǵanda sońǵy 15 jylda jańadan mektep ǵımaraty salynbaǵan eken. Jańa oqý jylynda jumysyn bastaǵan qos oqý shańyraǵy der kezinde ashylǵan qutty ǵımarat bolyp otyr. Al bul bilim shańyraqtarynyń materıaldyq-tehnıkalyq bazasy tolyqtaı jabdyqtalyp, zamanǵa saı bilim berýge laıyqtalǵan eken.
Qalmahanbet MUQAMETQALI,
«Egemen Qazaqstan»
Almaty oblysy
