«Qazaqstan Respýblıkasyndaǵy saılaý týraly» Konstıtýsııalyq zańnyń 101 jáne 113-baptaryna sáıkes shyǵyp qalǵan máslıhattar depýtattarynyń ornyna halyq qalaýlylaryn kezekten tys saılaý jylyna eki ret naýryzdyń jáne qazannyń sońǵy jeksenbisinde ótkiziledi. Osyǵan oraı 2018 jylǵy 28 qazanda respýblıkanyń 14 óńirinde saılaý ótedi.
Respýblıka boıynsha tutas alǵanda 83 bos oryn bar, sonyń ishinde oblystyq máslıhattarǵa – 12, qalalyq máslıhattarǵa – 9, aýdandyq máslıhattarǵa 62 oryn tıesili.
2018 jylǵy qazandaǵy saılaý naýqanyna depýtattardyń ókilettigin merziminen buryn toqtatýdyń negizgi sebepteri: birinshiden, tıisti ákimshilik-aýmaqtyq birliktiń shekarasynan tys turaqty turýǵa ketý (31), memlekettik qyzmetke qabyldaý (26), úshinshiden, otstavka týraly jeke ótinishi (16) (sonyń ishinde densaýlyǵyna baılanysty – 5), tórtinshiden, depýtattyń qaıtys bolýy (5), besinshiden, oblystyq máslıhattyń depýtaty bolyp saılanýy (3), altynshydan, Qazaqstan Respýblıkasynyń azamattyǵyn toqtatýy (2).
Máslıhattar depýtattarynyń ókilettigi kelesi laýazymdarǵa saılanýyna nemese taǵaıyndalýyna baılanysty merziminen buryn toqtatyldy: aýdan ákimi, aýdan ákiminiń orynbasary – 3 adam, oblystyq (aýdandyq) mańyzy bar qala ákimi, ákimniń orynbasary – 4 adam, aýyldyq okrýg ákimi – 4 adam.
Oblystyq jáne aýdandyq deńgeıdegi jergilikti atqarýshy organdardyń mamandary bolyp taǵy 14 máslıhat depýtaty taǵaıyndalyp, 3 aýdandyq máslıhat depýtaty oblystyq máslıhat depýtattary bolyp saılandy.
Kandıdattardy usyný 2018 jylǵy 28 tamyzda bastalyp, 27 qyrkúıekke deıin ótkiziledi. Kandıdattardy tirkeý 2018 jylǵy 2 qazanda aıaqtalady.
Otyrys barysynda, sonymen birge Qazaqstan Respýblıkasy Ortalyq saılaý komıssııasynyń «2018 jylǵy 5 qazanǵa taǵaıyndalǵan Qazaqstan Respýblıkasy Parlamentiniń Senaty depýtattarynyń saılaýynda Qazaqstan Respýblıkasy Parlamenti Senatynyń depýtattyǵyna kandıdattyń respýblıkalyq bıýdjet qarajatynan jabylatyn shyǵystarynyń mólsherlerin belgileý týraly» qaýlysy qabyldandy. Shyǵystar «Qazaqstan Respýblıkasyndaǵy saılaý týraly» Qazaqstan Respýblıkasynyń 1995 jylǵy 28 qyrkúıektegi Konstıtýsııalyq zańynyń 28-babynyń 3-tarmaǵyna, 33-babynyń 2-tarmaǵyna sáıkes, «2018-2020 jyldarǵa arnalǵan respýblıkalyq bıýdjet týraly» Qazaqstan Respýblıkasynyń zańyna sáıkes ázirlendi.
Joldybaı BAZAR,
«Egemen Qazaqstan»
