Elimiz óneriniń altyn qoryna jazylyp, erekshe reńkimen, jaǵymdy áýezimen júrekterge uıalaǵan Áset Beıseýov ánderi óziniń ómirsheńdigin dáleldep keledi.
Almatyda Ulttyq kitaphanada ótken belgili qalamger, Qazaqstan jýrnalıster odaǵynyń múshesi Tursynbek Eshenqulovtyń «Júregi án dep soǵatyn» kitabynyń tanystyrylymy barysynda Áset Beıseýovtiń syrǵa toly áýezdi ánderiniń tarıhy men shyǵarmashyl tulǵa ómiriniń erekshe bir sátteri jaıynda estelikter aıtylyp, avtor jınaqtaǵan basylymǵa qatysty tushymdy pikirler ortada toǵysty.
Almaty qalasy ákimdiginiń tikeleı qoldaýymen «Arna-b» baspasynan jaryqqa shyqqan kitap kompozıtordyń týǵanyna 80 jyl tolýyna oraılastyrylyp otyr. Kitapty jınaqtaýǵa eki-úsh jyl ýaqytyn arnaǵan avtor kompozıtordyń ózimen, otbasymen etene jaqyn aralasyp, shyǵarmashylyǵynyń ǵumyrshań bolýyna tilektestik bildirgen Kákimbek Salyqov, Muzafar Álimbaev, Nurǵısa Tilendıev, Tumanbaı Moldaǵalıev syndy tulǵalardyń estelikterin arnaıy jazyp alǵan eken.
Is-sharany júrgizgen «Almaty aqshamy» gazetiniń bas redaktory Qalı Sársenbaı Áset shyǵarmashylyǵynyń erekshe bir tustaryn tilge tıek etip, mazmundy estelikterge sóz kezegin usynyp otyrdy.
«Ásetpen 1965 jyldardan bastap etene aralasa bastadym. Ol jyldarda Úńgirtastaǵy mektep-ınternatta dırektordyń oqý isi jónindegi orynbasarymyn. Áset aýdandyq mádenıet bólimine qyzmetke keldi, mektep horyna jetekshilik etti. Aýyl mádenıetiniń órkendeýine barynsha úlesin qosty. Sol bir jyldarda Ásettiń muryndyq bolýymen aýdanymyzdyń ustazdary men balalar ujymy «Qazaqstan» telearnasynda konsert berip, ulttyq kanalmen tikeleı shyǵarmashylyq baılanysta bolyp turdy. Keıinnen Áset «Gúlderge» jetekshilikke aýysyp ketse de aýylmen araqatynasyn úzbedi. О́ziniń konsertterin uıymdastyryp, sálemin berip ketetin. Búginde Nurǵalı Núsipjanov oryndap júrgen, ulym Talǵattyń otaý kótergen shaǵynda shyǵarǵan «Qos júrek» áni syılastyǵymyzdyń bir nyshanyndaı ánge aınaldy», dedi saǵynyshty jyldardyń esteligimen bólisken Tursynbek aǵa.
Ásetteı dara tulǵanyń baýyry Amangeldi Beıseýov kompozıtor shyǵarmashylyǵyn nasıhattaý týraly máselelerdi ortaǵa salyp, kitap avtoryna alǵysyn bildirdi.
Kezdesý sońynda kúıshi Talap Qarash 1971 jyly «Jazýshy» baspasynan jaryq kórgen Áset ánderiniń «Gúlder» jınaǵyn kópshilikke usynyp, kezekti kúıge berdi. Al Altyn Álipbaeva, Uljan Aınaqulova syndy ánshiler sahna tórinde áýezdi ánderimen áser qaldyrdy.
Buǵan deıin kóptegen kitaptary arqyly oqyrmandar yqylasyna bólenip júrgen Tursynbek aǵamyzdyń jınaqtap, qurastyrǵan eseli eńbegine osy basqosýǵa jınalǵandar rızashylyǵyn bildirip, Ásetteı tulǵanyń áni urpaqtan-urpaqqa jalǵasyn tabady degen úlken senimmen tarqasty.
Elvıra Serikqyzy,
«Egemen Qazaqstan»
ALMATY
