Batys Qazaqstan oblysynyń Qaratóbe aýdanynda bes eldimekende taza aýyz sý júıesi paıdalanýǵa berildi. О́ńirde sońǵy eki jyl ishinde 110 aýyl osyndaı ıgilikke qol jetkizgen.
Qaratóbe sý qory kózinen Úshana aýylyna deıingi eldi mekenderdi sýmen jabdyqtaý júıesiniń qurylysy 2017 jyly bastalǵan edi. Shalǵaı aýyldardyń ózin ortalyqtandyrylǵan sý júıesimen jabdyqtaý isi sátti júrdi. Byltyr mamyr aıynda bastalǵan jumys bıyl tamyzda tolyq aıaqtaldy. Jańa júıeni tapsyrý saltanatty merekege ulasyp, halyqtyń qýanyshymen bólisýge Batys Qazaqstan oblysynyń ákimi Altaı Kólginov arnaıy keldi.
– Eldimekenderdi taza aýyz sýmen qamtý – Elbasymyz Nursultan Ábishuly Nazarbaevtyń tikeleı tapsyrmasy. Elbasy Joldaýdy júktegen mindetti oryndaý maqsatynda búgin Qaratóbe aýdanynda 5 aýylǵa ortalyqtandyrylǵan taza aýyz sý qubyryn tartyp otyrmyz. О́ńirlerdi damytý baǵdarlamasynyń «Aqbulaq» baǵyty aıasynda eki jyl ishinde oblysta 2 myń shaqyrym sý qubyry tartylyp, 110 eldi meken taza aýyz sýmen qamtamasyz etildi,- dedi óńir basshysy.
Qaratóbeniń bes aýylyn qamtamasyz etken sý qubyry jobasyna 915 041 96 mln. teńge bıýdjet qarjysy jumsalǵan. Jeliniń jalpy uzyndyǵy 130 shaqyrymǵa jýyq. Osy is aıasynda 4231 turǵyn taza aýyz sýmen qamtylyp, 823 nysanǵa taza sý qubyry tartylǵan.
Qazbek QUTTYMURATULY
«Egemen Qazaqstan»
Batys Qazaqstan oblysy
Sýretterdi túsirgen Raıymbek ABAEV
