Ulttyq kitaphananyń Baspasóz qyzmetinen habarlaǵanyndaı, kitaphanashylar sezi respýblıkadaǵy kitaphana salasynyń bolashaqtaǵy saıasatyn aıqyndaıtyn, jańǵyrtatyn jáne jańasha serpin beretin mańyzdy mádenı oqıǵa bolyp tabylady.
Qazaqstan kitaphanashylarynyń sezi sońǵy ret 1998 jyly ótkizildi jáne 20 jyldan soń barlyq júıeler men vedomstvolardyń kitaphanalyq qaýymdastyǵyn alǵash ret jınap otyr. Sezge 200 kitaphanashy qatysady dep kútilýde, onyń ishinde 184 – qazaqstandyq delegattar, 16 – shetel kitaphanalarynyń jetekshileri jáne AQSh, Túrkııa, Reseı, Belarýs, О́zbekstan, Tájikstan, Qyrǵyzstan jáne t.b. memleketter kitaphanalarynyń mamandary. Osy sezge qatysýǵa 300-den astam adam nıet bildirdi.
Búkilqazaqstandyq sezd – túrli aımaqtyq deńgeıdegi kópshilik kitaphanalardyń, ǵylymı, tehnıkalyq, joǵary oqý oryndarynyń jáne mektep kitaphanalarynyń mamandary, beıindi memlekettik organdardyń ókilderi, bıznes seriktestik jáne uqsas uıymdardyń elimizdegi kitaphana isiniń máselelerin sapaly sheshý, sapaly adamı kapıtalyn qalyptastyrý tujyrymdamasyn anyqtaý, respýblıkadaǵy kitaphana qoryn sıfrlandyrý joldary, aqparattyń qoljetimdiligin zańnamalyq qamtamasyz etý jáne basqa da ózara is-qımyldardy talqylaıtyn, resýrstar men múmkindikterdi biriktiretin kásibı dıalog alańy.
Sezd sheńberinde kitaphana dırektorlarynyń otyrysy, taqyryptyq seksııalyq kezdesýler, dóńgelek ústelder uıymdastyrylady, kitaphana salasynyń jetekshi sheteldik mamandarynyń qatysýymen fokýs-trenıngter, sheberlik-synyptary, tájirıbelik sabaqtar, Astana jáne Aqmola oblystarynyń kitaphana qaýymdastyǵymen merekelik onlaın-kezdesýler josparlanǵan.
Elvıra SERIKQYZY,
«Egemen Qazaqstan»
ALMATY
