Búginde álemniń kóptegen memleketterinde ishki jáne syrtqy qaýipsizdik máselesin kúsheıtýmen qatar mıgrasııalyq júıeni baqylaý, eńbek mıgranttarynyń qaýipsizdigin qorǵaý sııaqty ózekti máselelerdi sheshýde zamanaýı múmkindikterge basa nazar aýdarylýda. Azamattardyń elektrondyq júıede tirkelýi, sandyq júıe sııaqty baǵdarlamalardyń naqty nátıje berýi álemniń ozyq elder tájirıbesinen aıqyn ańǵarylady. Almatyda ashylǵan mıgranttarǵa qyzmet kórsetý ortalyǵy osyndaı áleýmettik mańyzy bar máselelerdi jańasha úlgide sheshýdiń bir baǵyty ispetti.
Kóshi-qon qyzmetterin kórsetetin ortalyqtar buǵan deıin Astana jáne Shymkentte ashylǵan bolatyn. Almaty eńbek mıgranttary kóp shoǵyrlanǵan aýmaq bolǵandyqtan, olardyń qujattama rásimderin jeńildetý ýaqyt údesinen týyndap otyr. Naqty derekter boıynsha aǵymdaǵy jyldyń basynan bergi merzimde mıgrasııa boıynsha 50 myńnan asa qyzmet kórsetilgen. Endi eńbek mıgranttary memlekettik qyzmetterdi halyqqa qyzmet kórsetý ortalyqtarynyń standartyna saı «bir tereze» qaǵıdaty boıynsha ala alady.
Sheteldik mıgranttardyń jumys isteýge ruqsat alýyn rásimdeýge buryn birneshe kún ári árbir qujat úshin birqatar mekemeniń esigin ashýǵa týra kelse, endigi kezekte sheteldikter qujattardy bir ortalyqtan az ýaqyttyń ishinde alý múmkindigine ıe boldy.
«Azamattarǵa arnalǵan úkimet» memlekettik korporasııasynyń Almaty qalasy boıynsha fılıalynyń dırektory Ǵalym Qarqynbaevtyń aıtýynsha, ortalyqtyń múmkindigi mol. Munda qujattardy jedel rásimdep qana qoımaı, sybaılas jemqorlyq áreketterin boldyrmaýǵa da yqpal eteri sózsiz ári jumys berýshi úshin de qolaıly.
Jańa ortalyq Almaty qalasyndaǵy «Alǵabas-1» yqshamaýdany, «Atletıkalyq qalashyq», 5/22 meken-jaıynda ornalasqan. Zamanaýı jabdyqtalǵan ǵımaratta mamandar erteńgi saǵat 9.00-den bastap keshki 18.00-ge deıin túski úzilissiz qyzmet kórsetedi. Ortalyqta kúnine shamamen 1,5 myń azamatqa qyzmet kórsetý josparlanyp otyr.
Elvıra SERIKQYZY,
«Egemen Qazaqstan»
ALMATY
