Maqsat – jumysty jolǵa qoıyp, jaǵdaıdy jaqsartý jáne kásipkerdiń jaýapkershiligin arttyrý. Osy oraıda bizder, demalýshy men em alýshy ne kórip, ne baıqadyq? Bir maýsymda demalýǵa kelgen 200-ge jýyq kisiniń basym kópshiligi ózimizdiń Túrkistan oblysy men Almaty qalasynan boldy. Deni qart kisiler, árqaısysy árıne ártúrli aýrýdyń qamytyna iligip, zardap shegýshiler dese de bolady. Atalǵan shıpajaıda kóńilimizge qaıaý túsirgen jaıt aıqaı-shýdyń jıi qaıtalanyp jatqany boldy. Halyqtyń mazasyn alǵan máselege tereń úńilip kórgen edik.
– Kelgeli beri tórt kún boldy, ne balshyq, ne vanna emin alǵan joqpyz. Anaý joq, mynaý jetispeıdi degen syltaýmen emdeý bólmeleriniń esigi jabyq tur. Bizden on kúndik qyzmeti úshin 90 myń teńgemizdi shytyrlatyp turyp sanap alǵan shıpajaıdyń sonda qyzmet qaıtarymy qaıda?, – deıdi almatylyq demalýshylar.
– Men sizderge aıtaıyn, – dedi jasy 80-ge kelgen shymkenttik ǵalym, professor Álimqul Baıbólekov ákimshilik qyzmetkerlerine jaımen ǵana sabyrly sóılep, – álginde almatylyqtar aıtqandaı biraz kún toqtap baryp, qaıta jumys istegen vannanyń aldynda emdelýshilerdiń qarasy kóp. Sonshama halyqqa kún uzaqqa qyzmet etetin bir-aq medbıke, ol qaısysyna úlgeredi. Kózimiz kórip tur, emdelýshilerdi qabyldap, rettep otyratyn medbıke munymen qosa bosaǵan vanna ydysyn ózi jýyp, ózi tazalaıdy, sýyn toltyryp, qosatyn qospasyn ózi daıyndaıdy. Nátıjesinde bári asyǵys atqarylady. Asyǵystyq oryn alǵan jerde jasyratyny joq, sanıtarlyq-gıgıenalyq talaptar óz dárejesinde saqtala bermeıdi.
Osyndaı aıqaı-shý, aǵalyq aqylǵa toly baıypty usynystan soń vanna sýymen emdeletinderge qosymsha kómekshi berildi.
Ondaı oryndy talap ashanada da oryn aldy. «Sizderdiń myna as-aýqattaryńyz árıne dıetalyq túrge jatady. Jaraıdy, solaı-aq bolǵan kúnniń ózinde jemis-jıdegi mol oblysta ornalasa otyryp, bizge berip jatqan jańa ónim salattary balabaqsha tárbıelenýshilerine beriletindeı kólemde, bir-eki shoqym ǵana» degen kópshiliktiń talabynan soń ashanada jalpy dastarqan máziri de jaqsaryp shyǵa keldi.
Buǵan qosa jatyn bólmelerde birde ystyq, birde sýyq sý bolmaǵandyqtan demalýshylar qoldaryna ydystaryn alyp, ári-beri júgirýmen ábigerge túsip jatty. Bul az deseńiz, jaryqtyń da jıi óship qala beretini demalýshylardyń júıkesin juqartýmen boldy. Demalýshylar «Osyndaı olqylyqtardyń aldyn alý úshin óz moınyna bar jaýapkershilikti alyp otyrǵan kásipker nege josparly jumys júrgizbeıdi» dep oryndy renishterin ústi-ústine bildirip jatty.
Ras, bul bul ma, em alýshylardy emdeý oryndarynda aýadaı qajet sanalatyn úlken súlgiden qysyp tastaǵandaryn da túsine almadyq. Bul aıtylýǵa ǵana maıda-shúıde bolyp kóringenimen kúndelikti qoldanysta úlken zárýlik týdyratyn kúrdeli másele ekenin tek em alýshylar ǵana jaqsy biledi.
Al biz bul shıpajaıdyń atqarýshy dırektory Rahymjan Qýanyshbekovti jumys ornyna qansha ret izdep barǵanymyzben, ókinishke qaraı jolyǵýdyń sáti túspedi. Shıpajaıdyń negizgi qojaıyny Almatyda turatyn bolyp shyqty.
Osy jaıǵa qarap otyryp-aq, tilimizge tıek etip, óz kózimizben kórgen demalýshylardyń kóńilindegi túrli jabyrqaýlardyń oryn alyp otyrǵan sebebin aıtpasa da túsinýge bolady.
Biraq bizge bir belgilisi – shıpajaıdyń óz esebi túgel, esepshotqa qarajat toqtaýsyz túsip jatqandyǵy. Qysqasy, burynǵy shıpajaı men qazirgi shıpajaıdyń arasy qaı jaǵynan alyp qaraǵanda da jer men kókteı.
Serikjan TURJAN,
Qazaqstannyń Qurmetti jýrnalısi
Túrkistan oblysy
