«Kazakh Tourism» Ulttyq kompanııasyna ór Altaıdyń aıbarly shyńyn baǵyndyrý ońaı bolmapty. Qatal tabıǵaty osaldardyń mysyn basyp, betin qaıtaryp tastaıtyn Muztaýǵa shyǵý árkimniń qolynan kele bermeıtini túsinikti. Qıyn sapardan qajyǵan ekspedısııa músheleri aman-esen etekke túsken bette olardy Shyǵys Qazaqstan oblysynyń ákimi Danıal Ahmetov arnaıy kútip aldy.
Qazaqstan men Reseıdiń shekara tusynda ornalasqan, qol sozym jerde Mońǵolııa men Qytaı qol bulǵap turǵan Muztaý – qoınaýy ańyz ben tarıhqa tunǵan qasterli meken. Oblys ákimi aıtqandaı, Altaıdyń taý jotalaryn aralaýǵa alpınıster men qarapaıym týrıster ǵana emes, Tıbet monahtary syndy túrli din ókilderi de qumar kórinedi.
– Altaı óńiri – Shambalanyń qaqpasy degen túsinik bar. Ejelgi dinı jazbalarda, sonyń ishinde Kalachakra tantra jazbalarynda aıtylǵan mıftik elge jol ashatyn qaqpa osy tóńirekte ekenine senetin din ókilderi kóp. Qalaı desek te, Altaı álemniń besigi ǵoı. Oǵan osy mańda tabylyp jatqan asa qundy tarıhı jádigerler de aıǵaq,– dedi ákim.
Astananyń 20 jyldyǵyna syı jasaýdy kózdegen ekspedısııa quramynda alpınızm sportynan Qazaqstan qurama komandasynyń múshesi, týrıstik kópsaıystan halyqaralyq jarystardyń júldegeri Eldar Ǵabbasov, alpınıst, bilikti bapker Artem Skopın jáne basqa da kásibı alpınıster men tájirıbeli saıahatshylar, tanymal jýrnalıster men blogerler bar. Maqsattary – Qazaqstannyń taýly óńirlerinde belsendi týrızmdi damytýǵa qolaıly jaǵdaıdyń bar ekenine otandastarymyzdyń jáne sheteldikterdiń kózin jetkizý.
– Ekspedısııanyń josparyn jasaý barysynda «Kazakh Tourism»-men keńesip, elimizdiń úsh óńirindegi 20 shyńǵa tańdaý jasaǵan bolatynbyz. Bul óńirlerde ekstremaldy týrızm men ekologııalyq týrızmdi damytýǵa múmkindik mol. Ekspedısııa júrip ótken baǵyttaryn tereń zerttep keledi, shara aıaqtalǵannan keıin osy marshrýt boıynsha ınfraqurylymdy damytýdyń joldaryn usynamyz,– deıdi Sporttyq týrızm qaýymdastyǵynyń prezıdenti Arman Hasenov.
100 adamnan jasaqtalǵan toptyń marshrýty Almaty, Túrkistan, Shyǵys Qazaqstan oblystaryn, Tıan-Shannyń batys jáne soltústik betkeıindegi silemderin qamtıdy. Sapar sońynda Túrkistan oblysynyń Saıran-О́gem ulttyq saıabaǵyndaǵy shyńdy baǵyndyrǵan ekspedısııa osy shyńdy «Astananyń 20 jyldyǵy» dep ataýdy josparlap otyr.
Arnur ASQAR,
«Egemen Qazaqstan»
