Árbir azamat óziniń qalaýy boıynsha kez kelgen emhanaǵa tirkelip, qyzmet túrlerin ala alady.
«Elordada kepildendirilgen tegin medısınalyq kómek kórsetý aıasynda turǵyndarǵa 51 uıym qyzmet kórsetedi. Bul kórsetkish aldyńǵy jylmen salystyrǵanda edáýir ósti», – deıdi Astana qalasy boıynsha «ÁMSQ» KEAQ fılıaly dırektorynyń orynbasary A.Amangeldıev.
A.Amangeldıev turǵyndardyń emhana tańdaý barysynda sanaly túrde sheshim qabyldap, úıine, jumys ornyna jaqyn nemese ózine qolaıly dep tapqan mekemege tirkelýge bolatyndyǵyn atap ótti.
Emhanaǵa tirkelý úshin áleýmettik medısınalyq saqtandyrý qorynyń qyzmet kórsetýshiler tiziminen emhanany tańdaý qajet. Atalǵan tizim Qordyń fms.kz saıtynda ornalasqan. Tańdaý jasalǵannan keıin azamat uıymnyń tirkeý bólimine jeke kýáligimen kelip, bas dárigerdiń atyna ótinish jazýy qajet. Emhanaǵa tirkelý barysynda ótinish qabyldanbaıtyn jaǵdaılar bolady jáne olardy túsinistikpen qabyldaǵan jón. Birinshiden, eger bir dárigerge tirkelgen adam sany eki myńnan asyp ketken jaǵdaıda. Bul rette tirkeýge ótinish jazǵan azamat qyzmet kórsetý aımaǵynan tys jerde turyp jatqan bolsa, onyń ótinishi qabyldanbaıdy. Al osy medısınalyq uıymǵa qaraıtyn ákimshilik ýchaskesiniń turǵylyqty turǵynynyń ótinishi eskeriledi. Ekinshiden, emhananyń qyzmet kórsetetin ýchaskesinen tys aýmaqta turatyn adam úıge dáriger shaqyrtý qyzmetinen bas tartýǵa kelispegen jaǵdaıda, ol azamat dál osy emhanaǵa tirkeýge tura almaıdy. О́ıtkeni medısına mamandary der kezinde naýqastyń úıine kómek kórsetý úshin berilgen ýaqyt ishinde jaıaý jetip úlgermeıdi.
Emhanaǵa tirkelýdiń ekinshi joly - onlaın tártipte, egov.kz portaly arqyly. Ol úshin azamattyń elektrondyq sıfrlyq qoltańbasy bolǵany jetkilikti.
Qazaqstanda turaqty turyp jatqan shetel azamattary men azamattyǵy joq tulǵalarǵa keletin bolsaq, olar emhanalarǵa kedergisiz tirkele alady.
Azamattar basqa BMSK uıymyna turǵylyqty meken-jaıyn, jumysyn, oqý ornyn aýystyrǵanda, jazasyn óteý merzimi aıaqtalǵannan keıin, áskerı qyzmetin ótep bolǵannan keıin, alǵashqy medısınalyq-sanıtarlyq kómek uıymy qaıta uıymdastyrylǵanda nemese taratylǵan jaǵdaıda, sonymen qatar, burynǵy emhanadaǵy qyzmet sapasy kóńilden shyqpaıtyn bolsa basqa emhanaǵa tirkele alady.
Esterińizge sala ketsek, ÁMSQ medısınalyq mekemelerdiń qyzmet kórsetý sapasyn baǵalaý maqsatynda «MSQ:Halyqtyq baqylaý» mobıldi qosymshasyn iske qosqan bolatyn. Mobıldik qosymsha azamattar úshin emhana tańdaý máselesin edáýir jeńildetini sózsiz.
