Shyǵystyń qysy qaharly keletini belgili. «Kári qudany» qarsy alýǵa óńirde daıyndyq qalaı? Otyn-sý jetkilikti me?
Oblystyq energetıka jáne turǵyn-úı kommýnaldyq sharýashylyǵy basqarmasynyń basshysy Murat Musataev Shyǵys Qazaqstan qysqa saqadaı saı ekendigin aıtady. «Bıyl halyqqa túsindirý jumystaryn kóktemnen bastap júrgizdik. «Qystyń qamyn jaz oıla» degendeı, turǵyndarǵa qystyń kelýin kútpeı-aq jaz aılarynda kómir túsirip alý kerektigin jetkizdik. Sonyń nátıjesi bolar, jospar boıynsha oblys halqy tamyz aıynda 220 myń tonna kómir alý kerek bolsa, bul kórsetkish bıyl jospardan asyp, 390 myń tonnaǵa jetti. О́ńirdegi iri kásiporyndardyń barlyǵy qysqa ázir. Ondaǵy kómir qory 180 myń tonna bolýy tıis bolsa, qazir 347 myń tonna kómir bar», - deıdi basqarma basshysy.
Aımaqtaǵy kómir baǵasy da qatań baqylaýǵa alynǵan. Oblystyq energetıka jáne turǵyn-úı kommýnaldyq sharýashylyǵy basqarmasynyń qyzmetkerleri «Qazaqstan temir joly» ókilderimen birge shilde men tamyz aılarynda «Qarajyra» kenishi basshylyǵymen jolyǵyp, kómir baǵasynyń turaqtandyrýǵa baılanysty jıyn ótkizipti. Qazir «Qarajyrada» bir tonna kómir jekelegen adamdarǵa 6200, Semeıde 7400, О́skemende (turmysy tómen azamattarǵa - 8350) 8800 teńgeden satylyp jatqan kórinedi.
Oblystaǵy mektepter qazirgi ýaqytta kómirmen 95 prosent qamtylypty. «Jyl saıyn óńirde jylý 15 qazannan bastap qosylady. Degenmen de biz 1 qazanda 100 prosent daıyn bolýǵa tıispiz. Bilim, densaýlyq nysandarynda kómir jetkilikti. Qarajat bólingen. Ákimdikter qadaǵalap otyr. Sýyq tússe, kez kelgen ýaqytta jylý qosýǵa daıar. Erekshe atap óter dúnıe, bıyl oblys ákimi Danıal Ahmetovtiń tikeleı aralasýymen qomaqty qarjy bólinip, Semeıge 20 jyl boıy berilmegen ystyq sý berildi», - deıdi Murat Musataev.
О́ńirdegi jylý ortalyqtary da búginde kómirmen artyǵymen qamtamasyz etilgen. «Semeı jylý energo» mekemesinde 32, О́skemen jylý ortalyǵynda 205, «О́skemen jylý júıeleri» mekemesinde 18 myń tonna kómir qory bar.
Azamat QASYM,
«Egemen Qazaqstan»
Shyǵys Qazaqstan oblysy
