Qol qoıý rásimi Astanada ótken «Aýǵanstan áıelderiniń quqyqtary men múmkindikterin keńeıtý» atty óńirlik konferensııa aıasynda júzege asty.
«Atameken» QR UKP Isker áıelder keńesiniń tóraıymy Lazzat Ramazanova memorandýmǵa qol qoıý barysynda bul oqıǵa eki eldiń kásipker áıelderi arasynda tikeleı isker baılanystardy ornatý úderisinde mańyzdy ári keleshekti qadam ekenin atap ótti.
«Memleket basshysy kótergen óńirlik bastamany «Atameken» QR UKP Isker áıelder keńesi tarapynan qoldap otyr. Jekelegen memlekettegi tynyshtyq pen ekonomıkalyq qaýipsizdik – óńirlik turaqtylyqtyń kepili ekenin aıtqym keledi. Búgin Ýafek hanym (Manıja Ýafek – Aýǵanstan áıelderi saýda-ónerkásiptik palatasynyń prezıdenti) ekeýmiz qol qoıǵan memorandým iskerlik baılanystardy ornatýda súbeli úles qosatynyna senimdimiz. Konferensııada eki eldiń er azamattary arasynda ǵana iskerlik baılanys ornaǵan degen oı aıtyldy. Búgingi memorandým bul jaıtty túzeıdi dep senemin», – dedi Lazzat Ramazanova.
Memorandým aıasynda Qazaqstannyń isker áıelderi aýǵan áriptestermen bıznestegi jetekshi tájirıbemen bólisý, memleketter arasyndaǵy saýda qatynastaryn damytý maqsatynda aqparattyq jáne bilim beretin is-sharalardy, tehnıkalyq trenıngterdi ótkizýge daıyn. Basty nazar aýyl-aımaqtaǵy yntymaqtastyqqa jáne aýyl sharýashylyǵy ónimin ótkizýge aýdarylady. Buǵan qosa Qazaqstan shaǵyn ındýstrııalyq parktterdi qurý boıynsha tájirıbe almasýǵa qyzyǵýshylyq tanytyp otyr, óıtkeni Aýǵanstan osyndaı parkti áıelderge arnap qurýdy bastap ketti.
«Yntymaqtastyq ornatqandary úshin qazaqstandyq áriptesterimizge alǵys aıtamyz. Shynymen, elderimiz arasynda er-azamattar ǵana yntamaqtastyq ornatqanyna úırenip qaldyq. Al áıelder arasynda osyndaı iskerlik baılanys bolǵan emes. Alaıda bul jaıt elimizde áıelder kásipkerligi joq degendi bildirmeıdi. Aýǵanstan áıelderi saýda-ónerkásiptik palatasynynyń qurylýy – elimizdegi áıelder kásipkerligi damyp, qarqyn alyp jatqanyn bildiredi. Eki el arasyndaǵy memorandým – jaqsy nátıjege ákeletin alǵashqy tájirıbe bolmaq», – dedi Aýǵanstan áıelderi saýda-ónerkásiptik palatasynyń prezıdenti Manıja Ýafek.
Dál osy kúni Aýǵanstan áıelderi saýda-ónerkásiptik palatasy «Qazaqstan isker áıelderi qaýymdastyǵy» qoǵamdyq birlestigimen yntymaqtastyq týraly memorandýmǵa qol qoıdy. Memorandým maqsaty – shyǵarylatyn ónimniń ótkizý naryǵyn keńeıtý.
Konferensııa barysynda «Aımaqtyq yntymaqtastyq arqyly áıelderdiń ekonomıkalyq múmkindikterin keńeıtý» atty paneldik sessııa Lazzat Ramazanovanyń jetekshiligimen ótti.
Is-sharaǵa Qazaqstan, О́zbekstan, Tájikstan men AQSh-tyń saıası jáne qoǵam qaıratkerleri qatysty. Konferensııada Orta Azııa memleketterinde áıelderdiń iskerlik daǵdylaryn damytý úshin qolaıly quqyqtyq jáne áleýmettik orta qalyptasyp jatqany jáne áıelder kásipkerlik pen qoǵamdyq qyzmetke belsendi jumylyp jatqany týraly birneshe ret aıtyldy.
