«Nur Otan» partııasy Tóraǵasynyń birinshi orynbasarynyń Batys Qazaqstandaǵy jumys sapary Oral qalasynyń jańa shaǵyn aýdanynda «7 – 20 – 25» baǵdarlamasy boıynsha boı kótergen 90 páterlik kópqabatty úıdiń qurylysymen tanysýdan bastaldy. Oblysta 2018 jyldyń 7 aıynda 250 myń sharshy metrden asa baspana paıdalanýǵa berilgen. Jyl sońyna deıin taǵy da 415,7 myń sharshy metr, onyń ishinde Bes áleýmettik bastamanyń birinshi baǵyty boıynsha 46 myń sharshy metr baspana salynady dep josparlanǵan.
«7 – 20 – 25» baǵdarlamasynyń júzege asyrýǵa jaýapty ekinshi deńgeıli bank ókilderiniń aıtýynsha, Batys Qazaqstan oblysy boıynsha 75 ótinish kelip túsip, onyń 55-ine qatysty oń sheshim shyqqan. Jaqyn ýaqytta azamattar óz páterleriniń kiltterin alady.
– Elbasy barsha qazaqstandyqtardyń úıli bolýyna dańǵyl jol ashyp, ıpotekalyq nesıelerdiń qoljetimdiligin qamtamasyz etip otyr. Osy sapar nátıjesinde Bes áleýmettik bastamanyń Batys Qazaqstan oblysynda tabysty júzege asyrylyp jatqanyna kýá boldyq, – dedi partııa Tóraǵasynyń birinshi orynbasary.
Kezdesý barysynda M.Áshimbaev jáne Altaı Kólginov Batys Qazaqstan oblysy boıynsha «7 – 20 – 25» baǵdarlamasynyń alǵashqy qatysýshylaryna páterleriniń kiltin tabystady.
– Elbasynyń tikeleı tapsyrmasymen qurylǵan «7 – 20 – 25» baǵdarlamasy qazirgi kúni óz jemisin berýde. Halyq prosenti tómen, aı saıynǵy tólemi tıimdi, sapaly páterler alýǵa bolatyn baǵdarlamaǵa oń baǵa berip otyr. Bul baǵdarlama bolashaqta baspanaly bolýdy armandaıtyn azamattar úshin jalǵasa túseri anyq, – dedi Máýlen Áshimbaev.
Máýlen Áshimbaev, sondaı-aq Mahambet О́temisov atyndaǵy Batys Qazaqstan memlekettik ýnıversıtetinde ashylǵan IT-ortalyqta boldy. Ortalyqtyń jumysy eki baǵytqa bólingen: IT-sala mamandarynyń biliktilikterin arttyrý jáne Jumyspen qamtý ortalyǵy arqyly jiberilgen azamattardyń sıfrly saýattylyǵyn jetildirý. Osy ýaqytqa deıin Jumyspen qamtý ortalyǵy arqyly kelgen 54 azamatqa sertıfıkattar tabystalǵan.
Mahambet О́temisov atyndaǵy Batys Qazaqstan memlekettik ýnıversıtetinde ashylǵan IT-ortalyqta aǵymdaǵy jyldyń 1 tamyzynan bastap aımaq boıynsha 30 ınformatıka muǵalimi baǵdarlamalaý, robot tehnıkasy jáne 3D modeldeý negizderi jaıynda tereńdetilgen bilim alǵan. Bolashaqta bul mamandar Batys Qazaqstanda ashylǵan tegin IT-synyptarda oqýshylarǵa bilim beretin bolady.
Osyndaı IT-synyptardyń biri Oral qalasyndaǵy Jastar jáne oqýshylar saraıynda ashyldy. Qazirdiń ózinde Batys Qazaqstan oblysynda 15 IT-synyp ashylyp, onda 150 mektep oqýshysy IT salasy boıynsha bilim alýda.
Máýlen Áshimbaev Jastar jáne oqýshylar saraıynda ashylǵan kovorkıng ortalyqta óńirlik jastar uıymdarynyń ókilderimen kezdesti. Búginde Batys Qazaqstan oblysynda 4 kovorkıng ortalyq ashylǵan. Olardyń úsheýi oblys aýdandarynda, bireýi Oral qalasynda.
«Nur Otan» partııasy Tóraǵasynyń birinshi orynbasary jastar uıymdarynyń ókilderimen ótken kezdesýde Prezıdenttiń tikeleı tapsyrmasymen partııa qolǵa alǵan 20-dan astam jańa joba jaıly baıandady. Sonymen qatar M.Áshimbaev jastardy sıfrlandyrýdy júzege asyrýǵa, «Rýhanı jańǵyrý» baǵdarlamasyna úles qosýǵa baǵyttalǵan partııalyq jańa jobalardy júzege asyrýǵa jáne aldaǵy ýaqytta elimizde keńinen engizý úshin jastar ıdeıalary men jobalarynyń tizimin jasaýǵa belsene qatysýǵa shaqyrdy.
– Birinshiden, ár adam ózin-ózi únemi jetildirip, damytyp, izdenýi tıis. Kásibı, zııatkerlik jáne bilim deńgeıin arttyrýǵa erekshe kóńil bólýleri kerek. Kitap oqýdy ıgi dástúrge aınaldyrýy qajet. Bul rette oqıtyn kitaptardy durys tańdaý kerektigin de eskergenimiz jón. Ekinshiden, sananyń ashyqtyǵyn qalyptastyrýymyz kerek. Elbasy da «Rýhanı jańǵyrý» baǵdarlamasynda osy máseleni kótergeni belgili. Iаǵnı jastar birjaqty bolmaı, kez kelgen máselege qatysty basqa da balama pikirlerdi eskerip, dúnıetanym aıasyn udaıy keńeıtip otyrýy tıis. Úshinshiden, jastar aldaryna naqty maqsattar qoıyp, durys armandaı bilýleri tıis. О́ıtkeni jastarynyń armany asqaq, maqsaty aıqyn bolmasa, ondaı eldiń bolashaǵy bulyńǵyr. Sondyqtan jastar aldaryna strategııalyq maqsattar qoıyp, soǵan jetý jolynda bar kúsh-jigerin jumsaýy kerek, – dedi Máýlen Áshimbaev.
Kovorkıng ortalyqta bastysqazaqstandyqtar Máýlen Áshimbaevqa shaǵyn jáne orta bıznesti qoldaýǵa baǵyttalǵan partııalyq joba aıasynda ázirlengen «SMART URALSK» avtomattandyrylǵan júıesin tanystyrdy. «Onlaın ulttyq biryńǵaı geoaqparattyq qyzmet» portaly arqyly partııa kásipkerlerdiń bos jer telimderi týraly tolyq aqparat alýǵa jáne ol barlyq qoldanýshyǵa qoljetimdi bolýyn kózdep otyr.
Oral qalasy elimiz boıynsha «aqyldy qala» júıesin Astanadan keıin engizgen ekinshi qala boldy. Máselen, Oral qalasy ákimdiginiń ǵımaratynda bólimderdiń jeke jáne zańdy tulǵalarǵa qyzmet túrlerin kórsetýge arnalǵan «Ashyq ákimdik» atty ınnovasııalyq jobany júzege asyrýda. Osynyń arqasynda qala ákimdiginiń ǵımaratynda ornalasqan jer qatynastary, sáýlet jáne qala qurylysy, aýyl sharýashylyǵy bólimderine qyzmet alýǵa kelgen turǵyndar túrli yńǵaısyzdyqtardan túgelimen arylǵan. Qazir barlyq qyzmetti «bir tereze» qaǵıdasy boıynsha alýǵa bolady.
Sondaı-aq Máýlen Áshimbaev aımaqtaǵy partııa aktıvimen kezdesti. Keleli kezdesýde «Prezıdenttiń bes áleýmettik bastamasynyń» jáne jańa partııalyq jobalardyń júzege asyrylý barysyna baqylaý júrgizip, atqarylǵan jumys barysy talqylandy.
Qazbek QUTTYMURATULY,
«Egemen Qazaqstan»
