Mekteptegi dástúrli ata-analar jınalysy kóptegen máselelerdi sheshýge kómektesetini anyq. Alaıda, synyp jetekshileriniń aıtýynsha, ata-analarmen qarym-qatynas ornatýdyń bul túrinde birqatar qıyndyqtar týyndaıdy. Eń basty sebebi – pedagogterge júkteletin jumystyń shamadan tys bolýy jáne jınalysty ótkizý ádisiniń eskirýi. Saıyp kelgende, bul ata-analardyń mekteppen qarym-qatynas ornatýyna áser etedi. «Birińǵaı respýblıkalyq ata-analar konferensııasynyń» dástúrli ata-analar jınalysynan ereksheligi – bul jas urpaqty ınnovasııalyq bilimdermen jáne otbasylyq tárbıeleý ádisterimen oqytýǵa baǵyttalǵan jáne túrli taqyryptardy qamtıtyn jańa format. Osyǵan oraı Respýblıkalyq ata-analar konferensııasyn elimizdiń barlyq mektepterinde ótkizý josparlanǵan. Kezdesý barysynda ár synyptardyń ata-analaryna arnalǵan túrli taqyryptar qozǵalady.
Atalǵan konferensııanyń alǵashqy jıyny apta sońynda elimizdiń barlyq mektepterinde ótti. Elordadaǵy №54 mektep-lıseıiniń qabyrǵasynda uıymdastyrylǵan mańyzdy máslıhatqa Bilim jáne ǵylym vıse-mınıstri Ashat Aımaǵambetov arnaıy qatysyp, bul konferensııanyń ustaz, ata-ana, oqýshy úshin qanshalyqty qajet ekenin tilge tıek etti.
«Búgin bizdiń elimizdiń barlyq mektepterinde biz úshin, jalpy qoǵam úshin mańyzdy is shara ótkizilýde. Eń birinshi barlyǵyńyzdy osy jańa oqý jylymen quttyqtaımyn. Bıyl 1 qyrkúıek kúni elimizdiń 7024 mektebine 3 mıllıonnan astam oqýshy kelse, olardyń 350 myńnan astamy 1 synypqa barǵandar. Mektep tabaldyryǵyn endi attaǵan búldirshinderimizdiń sany jyl saıyn artyp kele jatqany bizdi qýantady. Mektepke alǵash baryp otyrǵan balalardyń ata-analarymen tyǵyz baılanysta bolyp, osyndaı konferensııalardy ótkizý mektep pen ata-ana arasyndaǵy qarym-qatynasty odan ári arttyrady. Búgin sizderdiń nazarlaryńyzǵa bizdiń mamandarymyz túrli taqyryptarda oı qozǵaıtyn bolady. Mysaly, balanyń aqparattyq qaýipsizdigin qamtamasyz etý taqyryby. Bul da óz aldyna ózekti. Nege deseńizder, qazirgi tańda bizdiń búldirshinderimiz balabaqsha jasynda bolsa da, planshet, smartfondardan alýan túrli aqparattar alady. Sondyqtan eń birinshi bala qandaı aqparat alyp jatqanyn qatań qadaǵalaý kerek. О́tken jyly Elbasy «Bolashaqqa baǵdar: rýhanı jańǵyrý» baǵdarlamasyn jarııalaǵan bolatyn. Osy baǵdarlamada bilim salasyna, tárbıe salsyna qatysty mańyzdy máseleler kóterildi. Olardyń barlyǵy ret-retimen atqarlyp jatyr. Sonymen qatar, qazirgi tańda bilim salsyndaǵy jańa baǵdarlamalar týraly ártúrli aqparattar taralýda. Biz ol baǵdarlamalardyń barlyǵyn saraptaýdan, saralaýdan ótkizip, 2000 jyldardan bastap júrgizip kelemiz. Sebebi, bizge fýnksıonaldyq saýattylyq kerek. Biz burynǵydaı balaǵa tek aqparatty jattatyp, sonymen shyǵa almaımyz. О́ıtkeni búgin aqparat óte jyldam ózgerýde. Kóbeıýde. Sondyqtan eń birinshi telefondardaǵy, basqa da qurylǵylardaǵy aqparatty jattaǵannan góri ony qalaı paıdalanamyz degen suraqtyń jaýabyn qarastyrý qajet. Meniń aıtqym kelgen taǵy bir másele, ol ustaz mártebesi. Ustaz mártebesi degen ol tek memleket sheshetin másele emes. Oǵan ata-analardyń da qosatyn úlesi qomaqty. Nege? Sebebi, siz dastarhan basynda mekteptegi muǵalim týraly jaǵymsyz pikir aıtatyn bolsańyz ony balańyz da tyńdap otyrýy múmkin. Odan keıin ustazdyń mártebesi qalaı kóteriledi? Kóp máseleler otbasyǵa baılanysty. Osy másele boıynsha da, ustazdardyń jalaqysyn kóterýge baılanysty da biz kóptegen jumystar atqarýdamyz», dedi A.Aımaǵambetov.
Atalǵan oqý ordasynyń basshysy Shákárim Tolybaıuly bul sharanyń negizgi maqsaty – mektep ákimshiligi, muǵalimder jáne ata-analar qaýymdastyǵynyń arasyndaǵy birliktik, osy birliktiń arqasynda mektepke jańadan qadam basqan 1 synyp oqýshylaryna pedagogıkalyq, psıhologııalyq keńes berý ekenin jetkizdi. Sondaı-aq, konferensııa barysynda «Balanyń aqparattyq qaýipsizdigin qamtamasyz etý», «Balada ınternet-táýeldilik qalyptasýynyń aldyn alý», «Mektep ortasyna destrýktıvti dinı aǵymdar engizýdiń aldyn alý», «Otbasylyq qundylyqtardy nyǵaıtý», «Balaǵa mektepke oqýǵa beıimdelýge tıimdi kómek sharalary týraly», «Neıro-psıhofızıologtardyń bolashaq birinshi synyp oqýshylary - uldar men qyzdardyń ata-analaryna arnalǵan ustanymdary», «Balanyń ózin-ózi baǵalaýyn arttyrýǵa yqpal etińiz, ony jıi maqtańyz, biraq maqtaýyńyz laıyqty bolsyn» degen mańyzdy taqyryptar mańaıynda baıandamalar oqylyp, psıholog mamandardyń pikiri aıtyldy.
Shara aıaqtalǵan soń balasyn 1 synypqa bergen ata-ana Marjan Nurshaıhqyzyn áńgimege tartyp, konferensııadan qandaı oı túıgenin suraǵan bolatynbyz.
«Men ózimniń balamdy mektepke bermeı turyp bilim salasy jaıly, mektep jaıly pikirim jaǵymsyz jaǵynan basym boldy. Sebebi qyzmettegi áriptesterimniń mekteptegi júıe týraly kóńilderi tolmaıtyn kóp sózderin estigen edim. Osy konferensııaǵa shaqyrǵan kezde qatardaǵy bir jınalys shyǵar dep oılaǵan edim. Biraq ol jerdegi shaqyrylǵan qonaqtardyń alýan túrli aqparattary, mańyzdy pikirleri meniń oıymdy túgeldeı ózgertti deı alamyn. О́ıtkeni men bul jıynnan kóp áser aldym. Eń birinshi maǵan unaǵany uımdastyrýshylar búgingi tańdaǵy mańyzdy másele ıaǵnı balalardyń aqparat alý, ony paıdalaný jaıyn durys tańdaǵan. Vıse-mınıstr atap ótkendeı biz barlyq mindetti tek mektepke nemese muǵalimderge artyp qoıyp qarap otyrmaýymyz kerek. Nege deseńiz, balanyń qalyptasýyna ata-ana 80 paıyz áser etedi. Jáne ol kóp ýaqytyn óziniń otbasynda ótkizedi. Osyny eskere otyryp ata-analar qaýymyda jumysy qaýyrt bolsa da, balasyna nazar aýdaryp, qandaı aqparat alyp jatqanynan habardar bolýy kerek. Sonymen qatar, spıkerlerdiń bilim men tárbıeni qatar alyp júrý kerek degen pikiri asa qundy jáne bizdiń bolashaǵymyz úshin mańyzdy», deıdi ol.
Raýan QAIDAR,
«Egemen Qazaqstan».
